Cun lôr, a Manzan e Bresse, il Côr “Arrigo Tavagnacco” e “Castions delle Mura”
La Corâl San Canzian di Cjampfuarmit, che e à di pôc festezât i 45 agns de fondazion cuntun conciert une vore partecipât ae fin di Novembar stât inte glesie di Bresse, e propon un altri moment impuartant che al medie musiche corâl, riflession e meditazion, in preparazion de Pasche. Il progjet si clame “Mysterium fidei”, al tocje la cuarte edizion e al è dentri dal cartelon regjonâl di Paschalia de Union des Societâts Corâls dal Friûl-Vignesie Julie. Si tignarà in dôs datis, cun inizi aes 8.45 di sere vinars ai 27 di Març inte glesie di Sante Marie Assunte a Manzan, e sabide ai 28 inte glesie de Imaculade Concezion di Bresse di Cjampfuarmit.
◆ Dongje de Corâl San Canzian direzude di Nicola Rossi, ideadore e promotore de manifestazion, al sarà presint ancje il Côr “Arrigo Tavagnacco” di Manzan e il Côr “Castions delle Mura” direzûts di Michele Gallas, cun al orghin Alberto Pez. E je une des carateristichis tra chês plui di laudâ de formazion “canzianine” chê di condividi cun altris realtâts corâls moments di esibizion, che no vuelin jessi ocasions vueidis par metisi in mostre, dut altri. A son pluitost la ricercje di situazions utilis par condividi passions, par tignî dongje la int tal non di une vocalitât che e slargje messaçs di grant valôr, no dome artistic, ma sociâl, umanitari, identitari, e dispès la lenghe furlane e devente veicul privilegjât par chestis trasmissions e comunions di intents.
◆ “Mysterium fidei” al indaghe il misteri de fede tal moment di plui grande soference de umanitât che si trasfigure inte Passion di Crist che al va incuintri ae crôs. La Corâl San Canzian e à pensât alore di fâ cjatâ i tescj sacris cun musichis di variis epochis, dal Rinassiment ae musiche contemporanie, messedant i cjants cun proiezions di imagjinis di grande sugjestion e cu la leture di tescj par furlan inte traduzion di pre Toni Beline. Come che a disin i organizadôrs: «La sielte dal furlan e vûl rapresentâ lis lidrîs dal nestri popul, come che il misteri de Pasche al rapresente il fondament de fede cristiane». A côrs unîts al inizi e ae fin, alternâts invezit dilunc la narazion misteriche, si cjantarà dal “O Sacrum Convivium” di Luigi Molfino al “Alleluia” di Gordon Young, traviersant Palestrina, De Victoria, Tomadini, Obrecht, Dubra, Sebastiano Zanetti, cun tocs gjavâts fûr ancje de “Missa Pro Defunctis” di Licino Refice e de “Via Crucis” di Liszt. La liende che e va dai preparatîfs de cene di Pasche, traviers la eucarestie, la ricompense prometude ai apuestui, il mont dai ulîfs e l’arest di Jesù, il discognossiment di Pieri, il Crist devant al Sinedri, Erode e Pilât, la vie dal calvari, la crucifission, la derision e l’insult, la muart, la sepulture e finalmentri la resurezion. Cheste Via Crucis contade par furlan e puartarà cjantôrs e auditôrs a une profonditât insiemi a une altece di sintiments che dome la musiche e la lenghe mari a puedin fâ tocjâ, inte unitât di un popul che si ricognòs e si torne a cjatâ inte fede. ❚
