Pe 3e volte la Adunade dai furlans a Teôr!

E je par tornâ ancje chest an la Adunade dai Furlans a Teôr, pe sô tierce edizion! E noaltris de Pro Loco Teôr no viodìn la ore di viodius ducj tal nestri paîs sabide ai 11 di Avrîl tacant de une e mieze dopo gustât. Intant che il mont al va simpri plui daûr de vie de omologazion, nô o decidìn di cjapâ il troi mancul batût de difese e de valorizazion de identitât. Chest no tant par fâ i bastiancontraris, ma pluitost parcè che o crodìn che vê cussience des propriis lidrîs al zovi a restâ: restâ te storie cence vignî glotûts de massificazion sociâl; restâ in pîts cuintri cualsisei buriane, come un biel arbul, cun lidrîs ben sanis e fueis simpri verdis e gnovis. Cussì o scomencìn cun chel che o vin pensât pes fueutis: pai fruts un spetacul cun Daria Miani di Maman! e zûcs di une volte cun Maravee animazion, par ducj mirinde ufierte. Il program al è ancjemò in vie di definizion, ma o podìn dîus che l’event al è sore nuie e che a saran divertiments ancje pai grancj: esposizions, un bon gustâ e marcjât di prodots tipics furlans. A balâ o varìn il Grup Folkloristic “M. Grion” di Caprive, invezit pe musiche i côrs di Teôr e di Rivignan, i Furlans a manete, e in serade conciert dai Corte di Lunas, cun DJ set finâl.
◆ Sul palc a condusi il glîr e il gjat, ven a stâi cui che al scrîf e l’ambassadôr di cheste edizion: Doro Gjat!
Une biele gnove i plasarà ai sportîfs: par cui che al vûl, si podarà fâ un zîr in biciclete ae scuvierte dal nestri teritori cui amîs de FIAB dal Friûl di Mieç.
◆ Par ultin, no podevin no ricuardâ l’inovâl dal taramot. Lu fasarìn cul gjornalist Toni Capuozzo, il regjist Massimo Garlatti Costa, i professôrs Sandro Fabbro e Igor Londero e cun pre Roman Michelot di Glesie Furlane.
Lu fasarìn, dut câs, contant no la solite e retoriche narative dal taramot, ma rifletint doprant ponts di viste diferents. Intune epoche là che dut al ven vualivât al “FVG” e cumò i stan provant parfin cul Orcolat – fûr che cierts curiôs elements come par esempli l’aeropuart di Roncjis, in Friûl, che al devente Trieste Airport, invezit che FriuliVeneziaGiulia Airport, no mo? –, o volìn bati soredut suntun aspiet: il “Model Friûl” isal vignût fûr dal nuie? Nol è che magari il sucès di chê esperience nol sarès stât pussibil cence i Furlans?
◆ Chest e altri a Teôr sabide ai 11 di Avrîl dal dopodimisdì indenant pe 3e Adunade dai Furlans! Us spietìn!❚