La nestre campagne e fâs dûl.
La gjestion americanizade dai cjamps e à falît. I vuadagns son simpri mancul e i contadins cuasi sparîts.
◆ La tiere e je stade sfrutade, drogade e invelenade. I ramaçs dai pôcs arbui restâts, in tantis bandis, no vegnin plui taiâts, e a vegnin sbregâts. Su la çocje di chei che a jerin i nestris arbui plui biei al è stât butât il diserbant, e dopo ju vin lassâts li a fraidîsi. Cheste e je colpe nestre. Chei chi o sin nô.
◆ La gjestion de campagne e je un dai spiei dulà che in maniere plui clare o podìn cjalâsi.
Studi, tecnologjie, inovazion e il risultât al è chel chi: un orgoi.
La tiere si sta inmalant e indebilint simpri di plui, o stin lant indevant come trens a distruzi une ricjece uniche, chest nus fasarà paiâ un dazi che purtrop al sarà cjâr.
◆ Mi indreci a chei cuatri che no si metaran a ridi Al sarà pûr cualchidun che al varà voie di provâ! Tornìn a vierzi i libris des siencis forestâls e doprìnju par judâ la nestre campagne; chi si pues cambiâ dut e, in pôc timp, fâ ce che nol fâs nissun altri. Chi o podìn jessi i prins, altri che sotans. Rinaturalizâ la campagne, e une sô gjestion cussiente, e je une oportunitât che nissun nol viôt ma che e je grande.
◆ I beneficis a saressin incalcolabii, l’impat su la comunitât imediât e il coinvolziment de int totâl e trasversâl tal sô tocjâ plui setôrs. Un cambiament sempliç inte sô realizazion e cence coscj. Un teren, chel chi, fertil ancje par ducj i zovins che a podaressin meti in vore ce che a àn studiât, no sbassant il cjâf al servizi di grandis realtâts ma cu la voie di scomençâ une strade gnove, une strade lôr; cu la grinte e la braùre di chei che no àn voie di dî siôr sì. ❚
Le nestre campagne e à di resurî
Luca Bertossi
