O sin braurôs di vê podût intervistâ Marta Novello, diretore dal gnûf Museu Nazionâl di Archeologjie Subacuie dal Alt Adriatic che al è stât viert a Grau: i vin domandât cemût che al è stât ideât e realizât chest gnûf atrat che al insiore la ufierte culturâl de nestre regjon.
“Il Museu é stât screât a Grau ai 18 di Dicembar dal 2025. Al nas in graciis di un rinvigniment impuartant, che al rimonte al 1986: une nâf di ete romane cognossude cul non di Iulia Felix, vuê esponude al public dopo jessi stade ogjet di operazions di ricostruzion e restaur atents. La Iulia Felix, che al moment de cjatade e conservave la plui part de carene di len e plui di 500 anfuris, e je l’atrat centrâl dal Museu. E je stade cjatade a pocjis miis de cueste e recuperade tra il 1987 e il 1999 cuntun intervent complès di sgjâf. Par ce che al tocje la ricostruzion de carene, a son stâts fondamentâi i studis realizâts de équipe de Universitât Ca’ Foscari di Vignesie, smirâts ae ricostruzion virtuâl in 3D, pont di partence par realizâ il sisteme di supuart progjetât de dite Arguzie s.r.l.
Chest sisteme si base suntune schirie di ordenadis di açâl che a ripuartin il profîl des sezions de carene, là che i elements singui a son stâts rimontâts di une scuadre di archeolics navâi e restauradôrs. La gnove struture di poie no je dome il supuart pai rescj delicâts che si son conservâts, ma e à ancje la funzion di fâ percepî al visitadôr lis dimensions origjinâls de nâf. La Iulia Felix e je stade metude intun contest bon par ilustrâ il funzionament antîc dal sisteme portuâl di Aquilee. Di fat, il Museu al è organizât intune prime part introdutive che e espon i reperts archeologjics plui resints, cjatâts sui fonts marins e intal teritori lagunâr di Grau, introdusint duncje il contest tematic e storic là che il percors si disvilupe. Tal prin plan, invezit, e je logade la Iulia Felix, al centri di une narazion museâl che e permet di cjapâ dentri il contest storic e economic là che si movevin chest natant e il so ecuipaç; ator dal natant a son esponûts ogjets di len riferîts al guvier di chest mieç e materiâi di traspuartâts (soredut creps), cun di plui a son stadis esponudis lis variis anfuris di divignince diferente cjatadis te nâf.
Des iscrizions cjatadis su cualchi anfure, o podìn capî in chê epoche si traspuartave une salse di pes preseade produsude intal teritori di Aquilee.
Di là des anfuris, e je stade rinvignude su la nâf une bote cjariade di framents di veri destinade al riûs.
Dut il percors al è stât studiât tignint in considerazion prin di dut la acessibilitât de conte museâl, cun atenzion particolâr aes sieltis grafichis, ae progjetazion dai spazis e ae scriture dai tescj.”
__
Cuâi sono i disvilups previodûts pal avignî dal Museu?
“Par nô cheste inaugurazion e rapresente no dome un travuart impuartant, ma ancje un pont di partence, stant che il Museu al è dotât di uficis, spazis grancj di dipuesit e aulis didatichis che a podaran deventâ funzionâls a ativitâts di ricercje sientifiche, percors di aprofondiment e laboratoris dedicâts tant aes scueladis che aes fameis.
Tai mês che a vegnin a laran indenant lis voris di restaur des struturis esternis: la acessibilitât al edifici e vignarà miorade creant un colegament diret tra il passaç esterni su la rive e il spazi di cafetarie, che o previodìn di vierzi al public plui indenant tal timp.
O fasarìn ancje in maniere che il percors al sedi fruibil cun plui facilitât prontant percors tatii cun audiodescrizions e postazions multimediâls che i visitadôrs a podaran doprâ par imerzisi in maniere virtuâl inte archeologjie subacuie e inte sô storie.
Il Museu al sarà viert fin al mês di Avrîl ducj i fin di setemane (dal vinars ae domenie) e intes zornadis di fieste des 11 aes 18. Inte stagjon estive, invezit, al restarà viert di martars a domenie des 11 aes 19.” ❚
