La Groenlande inte smicje dai USA. Une ocasion par infuartî il so autoguvier e ancje la Europe?

«No si vent la tiere dulà che un popul al cjamine». Chê frase, che e varès di jessi stade dite di un impuartant esponent di un dai popui natîfs des Americhe dal Nord inte seconde metât dal Votcent, di in chê volte e je deventade un sproc condividût di ducj chei che a scombatin cuintri di cualsisedi forme di agression, colonizazion e alienazion politiche, economiche, linguistiche e culturâl. Vie pai ultins mês chês peraulis a sunin cun fuarce soredut cun riferiment ae Groenlande, che za di timp e je inte smicje dal president dai Stâts Unîts di Americhe (USA), Donald Trump, che in plui ocasions al à palesât la intenzion e salacor ancje il desideri di concuistâle cu lis buinis, tirant fûr une grampade di dolars o ben menaçant l’ûs de fuarce. Chê che e je la plui grande isule dal mont, che si cjate a Nordest dal Canadà, e je impuartante par resons strategjichis, parcè che si cjate intune posizion là che si incrosin i itineraris des nâfs bande dal Artic, passant de Asie ae Americhe e ae Europe, e par motîfs economics, par vie di dutis lis risorsis minerariis e energjetichis che si cjatin sot de glace e sot de tiere. Al è par chel che l’incuilin de Cjase Blancje al va dilunc a dî e a berlâ che i USA a vuelin vêle, parcè che ur covente e fintremai parcè che al sarès un lôr dirit.
◆ La Groenlande, cuntun statût di autonomie avonde impuartant, concuistât vie pai agns Setante dal Nûfcent dopo di mobilitazions politichis e sociâls par fâi cuintri a une situazion che e jere ancjemò coloniâl, e fâs part dal Ream di Danimarcje. Ancje in timps plui resints lis relazions tra Copenhagen e Nuuk, la capitâl groenlandese, a son stadis in plui di cualchi moment complicadis e conflituâls. Cundut achel, dome une piçule part de popolazion autoctone – i Inuits, che a àn une lôr lenghe e une lôr culture particolâr e ancje par vie di chês a àn fat indenant rivendicazions di autoguvier e di autodeterminazion– e somee lâ daûr des “sirenis” che a cjantin des bandis di Washington D.C. La plui part di lôr a àn cussience plene che la rivade eventuâl dai statunitens no ur zovarès par nuie. Pluitost la plui part di lôr, che a sedin al guvier o ben ae oposizion tes istituzions groenlandesis, e pense che chest gnûf senari al sedi la ocasion par infuartî l’autoguvier e inzornâ lis relazion cu la Danimarcje. Intant diviers Stâts europeans, che a son membris sei de Union Europeane (UE) che de NATO, a àn cjapât posizion a pro di Copenhagen e po ancje a pro di Nuuk. Forsit al sarès plui just che a fasessin il contrari: solidarietât, rispiet atenzion prime a pro de Groenlande e po ancje a pro de Danimarcje. Alc dal gjenar, almancul in principi dal an, si lu à viodût avonde pôc, ma forsit alc di plui e di miôr al varès di saltâ fûr in curt. Al saràs ben no dome pe Groenlande, ma ancje pe Danimarcje e pe Europe. Chel che al è clâr – cumò no varessin di jessi plui dubis – al è che lis relazions politichis, economichis e salacor militârs jenfri USA e Stâts europeans no je plui chê di une volte e che al covente che la UE e deventi pardabon une union cuntune struture federâl. Jean Monnet al diseve che al è propit intai moments di crisi che il procès di integrazion europeane al rive a fâ pas indenant e a cjatâ soluzions di sest. Viodarìn ce che al nas, dentri de UE, par ce che al tocje democrazie, dirits, citadinance e justizie sociâl, e ancje inte suaze dai rapuarts tra UE e il rest dal mont. Pal moment la situazion e je complicade e contraditorie, sei tal cjamp de economie e dai cumierçs, cemût che e salte fûr de gjestion e de conclusion dal acuardi cul MercoSur, sei bande di dutis lis crisis politichis ator pal mont, là che la Europe e coventarès ma par cumò no si le viôt o no si le viôt ancjemò avonde e avonde ben. ❚