Cincuante agns indaûr i predis di Glesie Furlane a son lâts incuintri aes comunitâts colpidis dal taramot. E vuê, intal inovâl di chel scjàs e di chei che i son vignûts daûr, il moviment al propon une schirie di incuintris che a son tacâts a Ospedalet ai 18 di Zenâr cu la conference di Agnul Floramo “Il taramot prime dal taramot”. Il secont apontament in rassegne ai 8 di Fevrâr a Vençon tal palaç Orgnani – Martina al è “Cu la int”, par scoltâ la testemoneance di doi predis in prime linie tes tendopolis dal taramot dal 76, ven a stâi pre Rizieri De Tina e pre Luigi Gloazzo. Ai 22 di Març a Osôf inte sale consiliâr al fevelarà il professôr Igor Londero par capî ce che al vûl dî “Une gnove nozion dal “model Friûl”. Da lis viciniis a la autogestion des tendopolis, fin al madon su la machine di Andreotti”. Par completâ la riflession su ce che al vûl dî puartâ indenant intal avignî il spirt e la vision dal 1976, Sandro Fabbro ai 12 di Avrîl al fevelarà a Vençon, simpri a palaç Orgnani – Martina, dal teme “Il Model Friûl e la Tierce Ricostruzion”. La rassegne e larà indenant ancje intal Autun: a Vençon in Otubar si contarà cemût che “O vin scombatût: Remo Cacitti e le ragioni ideali della ricomposizione di Venzone”. Il titul al è par talian parcè che il relatôr, il professôr Gabriele Pelizzari, al ven di Milan, là che al è stât un dai arlêfs predilets di Cacitti. Ma ancje se nol fevele par furlan, il so messaç al è di grande ispirazion par ducj chei che a crodin intal valôr de identitât. Ultime ocasion di riflession e sarà a Novembar, cuant che students e dotôrs di ricercje de Universitât Catoliche di Milan si daran dongje par resonâ su cemût che la ricomposizion di Vençon e devente “paradigma ideale del ruolo politico dell’umanista”.
◆ Incuintris di no pierdi, par no dismenteâ e no colâ intune vueide retoriche autocelebrative che no covente a capî pardabon ce che o sin stâts e ce che o varessin di tornâ a jessi. ❚
Glesie Furlane: incuintris par no dismenteâ
Redazion
