Par cjatâ lis lidrîs e scuvierzi il Friûl
Une sere di Dicembar dal 2024. Mê fie Mara mi dîs: “O ai voie di fâ il Troi di Aquilee – non furlan di chel che par talian al è il Cammino Celeste –, che di Barbane al rive tal Lussari, a pît.” “Bon – i dîs – ma cemût mai ti aie vignude cheste biele idee? Vevistu fat un avôt par vinci l’aur ae Olimpiade?” “No. O ai simpri agrât di dut il ben che o ai, ma nol è par chest. O ai let alc, o ai fevelât cun cualchidun che lu à fat, e o sint dentri un sburt a fâ cheste esperience. Ancje tu e la mame o vês fatis esperiencis di cjaminâ; parcè lu vêso fat?” “Vere, Mara, o soi lât a pît a Sant Jacum di Galizie tal ‘89 e ancje jo no vevi une motivazion precise, dome un desideri indentri. I amîs a peteçavin che o levi parcè che o vevin vût un fi mascjo, ma nol jere nuie vêr. Il russac al jere pront za di un an prime che al nassès to fradi, e dome par une schirie di fastidis o vevi scugnût rimandâ.” “Jo o soi lade a Sant Jacum di Galizie – e zonte Emanuela – a pene lade in pension. O volevi marcâ il gno mudament di stât, di lavoradore a pensionade, cuntun moment di libertât, dulà meti ae prove la mê autonomie. Stâ di bessole e savê rangjâmi e je stade une biele esperience.”
◆ “Alore ancje jo – e va dilunc Mara – o ai di marcâ la fin de mê cariere sportive. Dome che us domandi: vignaressiso cun me?” “Il Troi di Aquilee in prin al è facil, dut tal plan, ma dopo – o tenti di sghindâ la propueste – e monte sù pes monts! No sai se o rivarai a fâlu!” “Ma dai! Al baste che tu ti alenis e dopo no vin mighe di cori!” “E cuant fâlu? A son undis tapis, ven a stâi undis dîs, – o voi dilunc a cirî scusis – cuant mai cjatìno il timp, cun ducj i impegns che o vin?” “La mê idee – e zonte Mara – e je chê di provâ a fâ une tape ae volte e, ae fin di ogni tape, tornâ cjase. Lis primis a son achì dongje e dopo o viodarìn.” Par fâle curte, mi à tocjât rindimi.
◆ Cheste introduzion par dîus che chest an 2026 us contarai ogni mês te Patrie dal Friûl une tape dal Troi di Aquilee che noaltris trê o vin fat. No dome la croniche de tape, clâr, ma ancje lis emozions, i paisaçs, lis aventuris e lis falopis, il mangjâ, i paîs, lis lenghis, la int di dulà che al passe chest troi che al lenç dut il Friûl de bande di soreli jevât.
◆ Come che chest scrit al è il prolic de rubriche, cussì ancje il Troi di Aquilee al à une jentrade. Il Troi al scomence di Aquilee ma il toc di Barbane a Aquilee al ven clamât propit prolic. Si che duncje, dopo jessi stâts cul batel ae Madone di Barbane une dì dongje di Nadâl, ai 27 di Dicembar dal 2024, aes sîs e mieze di matine, o jerin a Grau e, tal non dal Signôr, o vin tacât a cjaminâ.
◆ Al jere ancjemò scûr. No podevin sielzi une zornade plui frede. No dome frêt – 2 grâts sot zero – ma ancje une buerute che e taiave la muse. O vevin maion, gjacheton, siarpe e la barete fracade a taponâ lis orelis ma di istès la buere e jentrave fin tai vues. “Bon dai – mi disevi – cul soreli al larà miôr”. In efiets, cul cjaminâ o scomençavin a scjaldâsi. Il piês al jere che jo no vevi puartât lis manecis e, stant che o vevi il gno baston, chel che mi compagne in ogni cjaminade, la man che lu tignive si inglaçave. Cussì, ogni cinc minûts le metevi a parâsi te sachete e i devi la volte cun chê altre.
◆ I Troi di Aquilee al passe su la piste ciclabile a ôr de strade che e scjavace la marine e che e lee la isule di Grau a Belvedè come il fîl di un acuilon. A drete e a çampe e je aghe e, plui che si è tal viert, plui e tire la buere cence padin. Cumò che al tache a sclarî, si viôt la lagune dute ingrispade dal aiar, si nase odôr di salât, si sint il scriulâ dai cocâi. Mê femine e mê fie a àn frêt. Bodifate che al tache a cricâ il soreli de bande di Barbane. No podìn no fermâsi e contemplâ il spetacul. O jerin incjantâts. La aghe e someave di arint e il soreli, che al jevave biel planc daûr dal Cjars, si spieglave su la aghe tirant une cumiere rosse infogade. Si sin cjalâts in muse. O jerin dûrs di frêt ma i nestris voi a mostravin une contentece grande par vê inviade cheste aventure.
◆ Rivâts a Belvedè, passade la biele glesie malsestade, o vin voltât a çampe, pai cjamps, fin ae pinede di S. Marc. Ce puest biel e simbolic! Dal mâr – e dîs la tradizion – al è rivât achì Marc, chel che al à scrit il vanzeli detât di S. Pieri, e dal mâr al scomence il Troi di Aquilee. De aghe ae tiere. O fasìn une polse sentâts sui scjalins de glesie tirade sù sul çuc di une dune. O fasin mirinde cjalant la lagune. E passe une barcje a vele. Cemût si fasial a no figurâsi che parsore nol sedi l’Evangjelist e, su la rive, Ermacore a spietâlu? O sin juste tal puest indulà che e tache la storie gloriose de Glesie di Aquilee.
◆ Di S. Marc il troi, marcât cun targutis blancjis cuntun pessut celest, al cor parsore dal arzin a ôr de lagune fin ae fôs de Natisse. A çampe aghe turchine, cocâi, folighis, une vore di cesens blancs e elegants, a drete campagnis aradis o verdis di forment. Aromai si cjamine in direzion tal tor maestôs dal patriarcje Popon. O passìn pes cjasis de perifarie, pes zonis residenziâls, denant dal municipi, jenfri lis cjasis vieris fin a cjatâ la muse de Basiliche, la Glesie Mari dal Friûl e di un biel toc di Europe. Tropis voltis che o soi stât in chest lûc ma cheste e je la prime che o rivi a pît. Emanuela no. Jê, plui di une volte e je rivade a pît di Muçane, cui fruts de sô classe elementâr, fin a Aquilee. Ce sodisfazion che e à di jessi stade, par un frut di nûf agns, fâ cheste esperience! Di visâsi par dute la vite! Jo, però, o sai ben ce che e vûl dî Aquilee. Mi passin pal cjâf i Celtis, i Romans, Ermacore, Atile, Fortunazian, Cromazi, Jaroni, Paulin, Popon, Siart, Ulrì, Beltram, Marquart, i venezians, i Asburcs, i talians. Vincj secui di storie! Al è just tacâ il Troi juste di chi. Ce che e je stade Aquilee te storie al varès di jessi il spieli di dulà che al varès di lâ il Friûl. Parcè mai – mi ven su il marum – i furlans no ricognossino chest grant valôr che a àn in cjase, impen di lâ daûr di sirenis forestis che no rispietin la bielece des nestris diferencis? Ma nol è il timp pai lambics. Dopo une preiere ae Madone Sunte piturade te abside e une vualmade al patriarcje Popon inzenoglât sot di jê cu la aureule cuadrade, o ai fat viodi a Mara la sente dai patriarcjis e i ai fevelât dal significât dai siei cinc scjalins, un plui biel di chel altri. Ae fin, te buteghe de place dal Cjapitul, nus àn timbrât il bol su la credenziâl dal Troi di Aquilee. I prins 15 chilometris a son fats!
◆ Sul misdì Andrea, l’om di Mara, al è vignût a cjolinus e cun lui o sin lâts a gustâ, une vore ben, All’Anfora a Tierç, là dal nestri amì Cesare di Cjarlins. La ocasion e meretave un tic di fieste. ❚
[Il mês che al ven la tape di Aquilee a Dael]
