I nûi, e il misteri che ju mude in ploie

I nûi a son scjaps di gotutis di aghe licuide in sospension tal aiar. La precipitazion e nas cuant che chestis gotis a deventin masse pesantis par jessi tignudis sù dal aiar e a colin. Ma parcè cierts nûi puartino ploie, o ben dentri di lôr uns pocjis di gotis rivino a vignî avonde gruessis par colâ, e invezit altris nûi no puartin ploie, ma anzit tal ultin si sfantin?
◆ E je esperience comun che a son i nûi plui pençs a menâ ploie. Di fat, intai nûi plui pençs al pues capitâ il fenomen de coalessince: lis gotutis di aghe a son tignudis in sospension di corints assensionâls, che lis sburtin insù e lis fasin lâ a sbati cuintri altris gotis. Chescj stos a puedin puartâ lis gotis a unîsi intune gote sole e, cussì, la dimension des gotis e va indenant a cressi. Cuant che une gote e rive a cirche 0,2 mm di diametri, l’aiar nol rive adore a tignîle sù e la gote e cole.
◆ Il mecanisim de coalessince si verifiche soredut intai nûi cjalts e al è plui frecuent inte fasse intertropicâl. Achì des nestris latitudins, massime vie pal Invier, plui dispès invezit i nûi a son frêts (val a dî, a àn temperaduris minôrs di 0°C) e la mecaniche e je diferente: si verifiche il procès di Wegener-Bergeron-Findeisen, che par capîlu bisugne meti dongje uns doi/trê concets.
◆ Tant par tacâ, bisugne savê che inte atmosfere il vapôr di aghe al è une vore râr: se propit al è bondant, al rapresente il 2% dal volum dal aiar. Al è dificil, duncje, che lis moleculis da la aghe, libaris intal aiar, a rivin adore a cjatâsi e a dâsi dongje, formant gotis di aghe licuide o cristai di glace. Dut câs tal aiar a son ancje polvars, il particolât atmosferic, o, inte forme plui lizere, l’aerosol, e un pôcs di chescj polvars, in gracie des lôr proprietâts chimichis e eletrostatichis, a rivin adore a atrai lis moleculis di aghe intor di lôr, permetint aes gotis di aghe, o ancje ai cristai di glace, di formâsi. I polvars che a permetin la formazion di gotis di aghe si clamin nuclis di condensazion dai nûi (cloud condensation nuclei, CCN) e a son une vore bondants; chei che a fasin formâ cristai di glace invezit si clamin nuclis di condensazion de glace (ice condensation nuclei, ICN) e a son un ninin plui rârs. A temperaduris jenfri i -40°C e i 0°C i nuclis di condensazion di dutis dôs lis fatis si metin in vore! Al pues lassâ maraveâts, ma jenfri i 0°C e i -40°C la aghe licuide, il vapôr e la glace a puedin pardabon convivi intai nûi. La aghe licuide che no glace si clame aghe in sorefusion e e ven mantignude licuide de pression superficiâl tor ator de gote. Dut câs, i cristai di glace si compuartin come canibai: ancje se a son plui rârs, a robin dut il vapôr che a cjatin e lis gotutis licuidis a man a man si suin, e dute la aghe e va a finî intor dal cristal di glace che a planc si disvilupe intes struturis esagonâls tipichis dal floc di nêf che po al cres e al cres tant che a un biel moment al cole!
◆ Intes latitudins mediis, duncje, la precipitazion e tint a nassi in forme di nêf. Nol è dit però che e rivi par tiere tant che nêf: chest al dipent de temperadure dal aiar che e travierse. Cun di fat, se dut l’aiar che i flocs di nêf a traviersin prin di rivâ in tiere al è frêt, alore al nevee. Se invezit al è cjalt, alore al plûf. A esistin però ancje viis di mieç: i flocs a podaressin passâ par une lint di aiar cjalt e, daspò, cjatâ di gnûf aiar frêt (ven a stâi, e podarès jessi une piçule inversion termiche in cuote). Inta chê lint di aiar cjalt i flocs si disfin, ma daspò a tornin a inglaçâsi, però cheste volte ur glace prin il fûr e po il dentri, o a podaressin fintremai glaçâsi dome par fûr. Cuant che e capite cheste robe, par tiere a rivin balins di glace, salacor cuntune anime di aghe licuide: la robe glaçade (par talian, nevischio). Se la lint di aiar cjalt e je cetant penze e l’aiar frêt a nivel di tiere nol à cuissà ce spessôr, alore la precipitazion e ven jù tant che ploie, ma juste che lis gotis a tocjin tiere si glacin a colp: chest fenomen al è chel de vereade (par talian, gelicidio). Cuant che, invezit, a son gotis di fumate che si glacin tocjant tiere, alore e ven la zîs (par talian, galaverna). Lis peraulis zîs e vereade, in veretât, a varessin un significât plui sfumât, ma simpri riferît a fenomens di cheste fate. La sielte lessicâl e je stade fate graciis al preziôs jutori di Sandri Carrozzo, Serena Fogolini e Sandri Pian. ❚