La Vierte meteorologjiche, tacade cul prin di Març, e je finide ai 31 di Mai. Come che i rapuarts de ARPA OSMER regjonâl nus mostrin, e je stade une stagjon cun timp variabil che al à menât cetante ploie sul Friûl (intal 10% plui alt dai ultins 10 agns intal Friûl di Mieç, culine e planure, e su lis Prealps Juliis e su la cueste orientâl) e temperaduris avonde dongje des mediis storichis dai ultins trente agns, ma istès plui cjaldis dal 1967-1996.
◆ Pardabon Març al à menât la code pal bearç: cinc fasis perturbadis si son ben sparniçadis vie pal mês, alternadis cu la presince dal anticiclon e di zornadis variabilis. Lis perturbazions tacadis ai 10 e ai 12 di Març a jerin causionadis di fronts atlantics, cun aiar di garbin in cuote ma ancje, intal secont câs, cun siroc a cuotis bassis. Chest efiet di veering, dutun cul scjaldâsi dal aiar ai 13 di Març in graciis di salustris, al à favorît la formazion di mesociclons, ven a stâi di moviments assendents dal aiar in rotazion, che a àn fat sù cuatri supercelis di burlaçs che a àn traviersât dute la alte Plane Furlane puartant ancje tampieste.
◆ E je stade di origjin atlantiche ancje la perturbazion sucessive; lis ultimis dôs, invezit, a son stadis di origjin mediteranie-taliane. Lis perturbazions dal mês di Març a àn puartât lis neveadis plui bondantis de stagjon 2024-2025, ma in sostance dome parsore dai 1500m. La prime part dal mês e à mostrât une grande escursion termiche zornaliere, cun minimis dongje dai 0°C ancje in planure e massimis parsore dai 15°C. Minimis tant che chestis si àn vudis ancje tor dai 20 di Març, e a son stadis invezit plui altis intal rest dal mês, cuant che ancje la escursion termiche zornaliere e je stade plui contignude.
◆ Avrîl al è tacât cuntun anticiclon setât su la Europe Ocidentâl che, daspò, al è rivât fin su la Italie. Lis temperaduris a son ladis sù rispiet a Març, cun massimis di plui di 20°C a Udin – Sant Svualt. Daspò de jentrade di aiar frêt de Scandinavie ai 6-9 dal mês, che al à fat sbassâ lis temperaduris, al è tornât a scjaldâsi fin a massimis che a van parsore dai 25°C pe fin di Avrîl a Udin. Events di ploie su dut il Friûl si son regjistrâts jenfri i 13 e i 18 dal mês, par vie di une depression slungjade su la Iberie che e à produsût un cutoff mediterani finâl, e ai 23-24 cun burlaçs produsûts de rivade di aiar frêt in cuote e piçulis depressions.
◆ Tai prins dîs di Mai il timp al è stât seren e lis massimis su la plane a son rivadis bielzà a 27-28°C. Ai 5-8 une depression atlantiche e à menade ploie e sbassadis lis massimis, puartant lis ultimis nêfs parsore dai 1500m. Dai 10 ai 16 il timp al è stât stabil, cu la ecezion di cualchi burlaç ai 12 e ai 15. Daspò, si son dadis la volte zornadis di ploie e di stabilitât.
◆ Di rimarc e je stade la zornade dai 22 di Mai, cuant che si son viodudis plui supercelis su dute la Planure, cence tampieste, ma cul disvilup di cetantis bissebovis, ancje inte Alte planure (Voleson, Dignan, Vilegnove di San Denêl, Buie). A Buri a son vignûts jù 103mm di ploie in trê oris (si spietisi che alc dal gjenar al sucedi une volte ogni 20-30 agns). Ae fin dal mês la massime a Udin e je lade dongje dai 30°C. La temperadure medie di Mai e je stade di 0.5°C plui alte dal trenteni 1990-2020, ma cun cetante variabilitât.
◆ Cheste Vierte e à puartât ploiis ecezionâls ancje su la Iberie par vie dai volts larcs de corint a gjet polâr e de presince frecuente di une alte pression jenfri l’Atlantic e lis isulis britanichis; pe stesse reson, la stagjon e je stade plui secje dal solit su la Gran Bretagne. ❚
Une Vierte cjalde e plene di ploie
Indrì Maiero