GO2025 e la autonomie regjonâl…

A jerin tantis lis sperancis de bande dai furlans pe viertidure di GO2025. In particolâr, tes iniziativis promozionâls e publicitariis, si spietavisi une presince paritarie des cuatri lenghis di chest teritori di frontiere. Manifescj e sprocs televisîfs a varessin vût di esprimisi par talian, par sloven, lenghis dai doi Stâts, ma ancje par todesc storichementri presint te piçule capitâl austroongjarese. E soredut par furlan come che si esprimevin i doi ultins rapresentants de diete di Gurize e Gardiscje tal parlament di Viene, Bugatto e Faidutti e come che e veve prometût a Tarcint, pal inovâl dal an passât dai trê di Avrîl, la assessore Barbara Zilli. E invezit nuie! Dome talian e sloven.
◆ Di ce àno pôre i sorestants de citât sul Lusinç? Di fâ brute figure a Bruxelles cuntune lenghe no statâl? O di fâi une malegracie ai parons dal vapôr di Rome? Lis iniziativis par GO2025 no son finidis e duncje si pues ancjemò rimedeâ, ancje parcè che la ocasion de prime citât europeane transfrontaliere, Gurize e Nova Gorica, e je uniche par rindi evident che si pues pensâ gnovis formis di colaborazion politiche e aministrative fra teritoris di confin in cheste Europe malsestade e cence rûl. Soredut achì, te nestre Regjon, batint cun fuarce su la nestre autonomie costituzionâl che vuê, plui di dut, e passe pe compresince – in chestis tieris – di plui lenghis storichis e di plui culturis, cuntune usance spontanie al dialic fra etniis diferentis.
◆ E je la funzion storiche e strategjiche dal Friûl e in particolâr di Gurize.
◆ A ce coventie, se no, cheste nestre autonomie di cjarte se no si è bogns, vint i imprescj, di metile in vore? E l’imprest dal statût di autonomie al è e al va doprât fin insom!
◆ Bisugnarès che la Regjon e cirìs e la sô vocazion sul doman, in cjamp viert. La mission e varès di jessi chê di rivalutâ la sô funzion inte suaze europeane, ancje par cont di Rome. Nol è pussibil che in timps di vuere frede, a contat cuntune tendine di fier che e divideve, cence osmosi, il mont in doi blocs, il Friûl al sedi stât il cûr de comunitât Alpe Adria che e à vût il merit di tignî vierts i confins a Nord e a Est permetint une colaborazion transfrontaliere valide.
◆ Vuê, invezit, dopo de colade dal mûr di Berlin, cence confins e cuntune Europe che ur domande ai Stâts di lavorâ adun, no sin in grât di pensâ e tant mancul di meti in opare riformis sperimentâls di gnovis organizazions juridichis e economichis par une gjestion dai teritoris cence spaltadis, aplicant e inovant il statût di autonomie. GO 2025 e il dibatit viert su lis gnovis areis largjis (Provinciis?) a puedin deventâ buinis oportunitâts. Bisugne jessi cussients di chest cence pôre di slargjâ lis competencis di autonomie. Al è un fat che al à di passâ tal cjâf de classe dirigjente nostrane cence complès di inferioritât, cun fantasie magari, e dant spazi a ducj, ancje a chei che a fevelin furlan. ❚