Cjoc di vore par necessitât, animâl di sagre par fâ fieste cun chei dal so paîs

Fabula narratur: l’Homo furlanus al è un che al pense dome che a lavorâ. Seriôs, impegnât, mai strac, possedût dal “diaul dal fâ”, un che la psicoanalisi contemporanie al definirès “workaholic”, ven a stâi un “cjoc di vore”, dal dut devot ae sô mission, nol rive a stâ mai cu lis mans in man. La poltrone? Un puest par poiâ la borse de spese. E cuant che al jes de fabriche, di scuele, dal ufici o cuant che al torne dai cjamps o sepi diu di dulà che si vuadagne il pan, al fâs di dut par inventâsi un timp libar che al sedi “ocupât”, plen di navigos, gredeis, robis di fâ e di cumbinâ, tant che nol cjate mai une ore di polse, calcolant ogni minût pierdût cence fa nuie un minût strassât di bant. Gjave al Homo Furlanus l’impegn e tu lu condanis al stress, ae depression, ae malinconie. Marcâ visite? Nancje mai pensât di fâlu. Se i miedis condots a vessin di vivi su lis justificazions par malatie, cui Furlans a muraressin di fam. Cualchidun al dîs che in Friûl si lavore tant vie pes fiestis, che no si viôt la ore di tornâ a tacâ la vore par tirâ un pôc il flât. Gjenerazions di fîs disperâts si son passade di man la lôr condane, di Tarvis a Cjarlins, par vie che i paris e lis maris ju metin sot a comedâ, netâ, bruscjâ, tirâ sù muruts di clap, taiâ la jerbe, piturâ, dâ di blanc, gratâ ringhieris, comedâ cops… Benedete la ore che si torne a scuele! Cussì si dimostre la alte cualificazion dai nestris students intes indagjins ministeriâls. A son i arlêfs plui devots dal Paîs. E par fuarce! Il puarton de scuele ju salve dal sfrutament minorîl che a patissin in cjase! E cheste e je la mitologjie. Tachìn cul sdrumà cetancj prejudizis ingropâts insiemi: il Furlan al gjolt fûr di misure cuant che infin al pues dedeâsi a progjetâ, condusi, imbastî o in maniere plui sclete al plasê di fâ fieste in place cun “chei dal paîs”, adiriture cun chel dongje di cjase, l’odeât nemì, e braurôs al cjale i forescj che a rivin di fûr clap ben content di dimostrâur il so bon acet plen (Homo Furlanus ors e solitari? Ma dulà!?), fat di gjenerositât e di spirt totâl di condivision. La dimostrazion plui evidente di cheste cundizion dute particolâr e di une inclinazion furlane pal divertiment e je cheste: chi di nô a son plui sagris che no sants in paradîs. E al è un grant biel grop di logjiche di disberdeâ, dal moment che la peraule “sagre” e ven fûr propit di “sacra”, ven a stâi la zornade dedeade al “patronus” de glesie dal paîs. Une volte si lu celebrave cuntune fieste grande propit sul sagrât devant dal “domo”. E stant che par latin chê posizion topografiche si varès di definîle “pro fano” (in maniere leterâl “fûr dal templi”), ve che la fieste e veve di cjapâ sù dute la ande di une celebrazion “profane”, pagane, incjarnide dentri di une tradizion di secui, là che il mangjâ in mût esagjerât e il bevi fuart a ufrivin il mani par une ande votade ae esagjerazion, e no dome alimentâr: bacan, musiche fuarte, bal salvadi e scalmanât, berghelotaments, ategjaments calcolâts sconvenients dal clericât. Une dimension dionisiache profonde, duncje, che e continue a pandi la sô anime in ducj chei apontaments che vie pal an, cence escludi nancje un dai dodis mês, ogni plui piçul paîs, ogni borc, si impegne a inmaneâ. Par fâ fieste. Cualchi esempli? La Sagre da la cjare, a San Pauli; lis “aucis”, ven a stâi lis ocjis, come che si clamin li di lôr, a Morsan; il taur a Buie, il frico a Flaiban, i cais a Turide, i crots a Bueriis, i cjarsons a Cleulis, il formadi a Glemone o il purcit e i purcitârs a Dartigne. Juste par fa cualchi non, dal moment che a meti jù in rie dutis lis ocasions di fâ “sagre” nol sarès avonde il puest di cheste rubriche. Vino di provâ a viodi cemût che al funzione? Aes primis lûs de sere, il viandant che al ves di cjapâ la strade che lu mene vie pai borcs contadins o lis plaçutis dai nestris paîs, che al sedi inte Basse brustulide dal Soreli o intal vert dai pins de Mont, al rivarès a nasâ intal aiar un cisâ di gridele, cuasi une promesse di robe buine a puartade di man. Cualchidun al à ben za tirât sù un breâr pront pai musicants: daûr de ore a sunaran musiche tradizionâl, come la “staiare”, par chei che a àn une cierte etât e dopo vê vuastât cun dute la calme dal mont, si fasaran doi zîrs di orchestre, po dopo a tornaran a cjase. Ma plui tart la solfe e cambie: pop, rock, dub, trap, rap. Ai plui zovins ur plâs tirâ sul tart, e duncje a rivaran cuant che la etât anagrafiche dai aventôrs si sarà sbassade, e no di pôc. Un zûc di lûs ben fat, la amplificazion juste, e il zûc al è fat! A distance di sigurece des cassis acustichis, ma no masse di lontan, gjostris e baracons: chei pai fruts a somein fermâts ai agns Trente! Vuê si disarès che a son “vintage”, ma la veretât e je dome che son a vecjons: cjavaluts, elefantuts che a svolin, biroçuts che a lampin lusôrs e che a sunetin cun vôs eletriche. I plui grancj invezit si lassin incjadenâ a struments di torture mecanics, ruedis che a zirin a mil, gabiots che ju sbalotin par fâju berlâ incjocâts di adrenaline. Si respire pardut puce di fritulis e di sbrume di zucar. La tradizion però e pretint di jessi rispietade: no pues mancjâ la zone risiervade ai grideladôrs e ai polentârs. Brusadulis, luianiis, cueste e poleç a sudin su la gratule ducj i pecjâts dal mont. E chi, pardabon, la anime dal “Homo Furlanus” e rive a pandi il miôr di se. Parcè che nol esist mascjo di cheste specie che nol vedi braùre personâl par preparâ une gridele come che Diu al comande: oris e oris di tirocini spindudis intes fiestis comandadis, tant che il Lunis di Pasche o la Madone di Avost a permetin di vê la credenziâl par jentrà intal “staff” che al viôt de gridele. E se la fieste e je fieste pardabon, alore bisugne che a sedin ancje i pessuts e i calamârs vignûts sù de marine. Patatis fritis come une resurezion! E democrazie esemplâr sul bevi: vin o bire, ancje intant che si spiete il turni par cjapâ sù i plats ordenâts ae casse, intant che femine e fruts e fasin la file! Inte culture popolâr e paisane dal Friûl cheste e je la ocasion che e ten insiemi Sants e Pecjadôrs, la procession fate vie pes stradis daûr dal baldachin de Madone, cu la bande in divise, e la cjoche sporcje, il precet di santificâ e la blesteme. La sagre! Plui une cundizion de anime furlane, che no un apontament sul calendari. Une sfide a preparâ e a gustâ il frico plui bon, la polente plui grande. La betoniere intal curtîl? Ma dulà? Pluitost la barache o il capanon par implantâ la cusine popolâr de Fieste. ❚