Lis mil formis dai cristai de nêf

Simbul dal Invier e je sigûr la nêf, un materiâl pardabon curiôs. La nêf, si sa, e je glace, ma o savìn ancje che no dute la glace e je nêf: o rivìn ben a capî la diference fra i cubuts che o prontìn tal conzeladôr e il polvarin lizêr che al cole dal cîl plombin. E je za plui fine, però, la diference fra la nêf e la brosate. Cemût si puedial sclarî ben ce che e je la nêf? Une imagjin une vore familiâr e pues judânus: chê dal cristal di nêf a forme di stele, che tant dispès o cjatìn dissegnât un pôc dapardut, su lis musutis di Whatsapp, sui tavaiuçs di cjarte, su lis balutis pal arbul di Nadâl. Cun di fat, la nêf e je propit chê idrometeore che e cole in forme di cristai a struture esagonâl, spes propit a forme di stele a sîs pontis. Ocjo, però, che il cristal di nêf nol scuen par fuarce vê forme di stele: il fisic gjaponês Nakaya si inacuarzè che la nêf e pues cjapâ forme di stele (o ben dendritiche) dome se si fâs sù jenfri i 0°C e i -5°C o jenfri i -10°C e i -25°C, cun tant umit. Pes stessis temperaduris, ma cun plui sec, la nêf e je a forme di placutis esagonâls; jenfri i -5°C e i -10°C, invezit, la nêf e ven in forme di gusielis o colonis esagonâls. Sot dai -25°C la nêf e cjape forme di colonis o placutis esagonâls. Se lis cundizions di formazion dal cristal a cambiin, e cambie ancje la forme dal cristal: si pues fintremai otignî “zimui di cjamese” se il cristal al nas tant che colone e daspò, cul cambiâ de temperadure, su lis sôs spicis a tachin a slargjâsi placutis. Il fisic californian Libbrecht si divertìs fintremai a inventâ formis gnovis pai flocs di nêf, mateant in laboratori cun temperadure e umiditât.
◆ Par trop complicade che e sedi la forme di un cristal di nêf, e à simpri a ce fâ cu la figure dal esagon regolâr. La reson di cheste simetrie e vûl cirude te gjeometrie de molecule de aghe, che e je fate di un atom di ossigjen tal mieç di doi atoms di idrogjen… o ben, no propit tal mieç: al ossigjen i vanzin cuatri eletrons che a frachin un tic i idrogjens de stesse bande. Tant e tant, la molecule di aghe si cjate a jessi polarizade: i doi idrogjens a tindin a jessi positîfs, l’ossigjen negatîf. In cheste maniere lis moleculis di aghe a puedin tacâsi tra di lôr come calamitutis, ogni ossigjen si cjate tal mieç di trê idrogjens: doi siei, un di une altre molecule, a distance di 120° un di chel altri, ven a stâi l’angul tipic dal esagon regolâr.
◆ Un floc di nêf al pues jessi fat di un cristal sôl (e chest al sucêt cuant che la nêf e cole secje, a temperaduris bassis) o di plui cristai tacâts, par esempli cuant che la temperadure e je dongje dai 0°C e la nêf e cole bagnade.
◆ Dut câs, colade che e je, la nêf in pôc timp e piert la sô struture: il vint, soflant, al romp i cristai; po i cristai si staronzin in grignei che si tachin tra di lôr e la coltre e ven salde, salacor judade dal disfâsi e dal tornâ a glaçâsi. Se al è masse frêt, però, i grignei no vegnin taronts, ma a forme di conis, che no rivin a tacâsi tra di lôr e culì la coltre e reste debile. Dut câs, tal mieç dai grignei al reste tanton aiar: i flocs di nêf secje, a pene poiâts, a fasin une coltre dense tor dai 50 kg/m3 (la aghe a ‘nd à 1000 kg/m3), che cul lâ dal timp e devente un pôc plui penze, fin a 300 kg/m3.
◆ Nancje la coltre de nêf no sta mai ferme: jù pes rivis des monts e tint a sbrissâ a planc in maniere viscose, tant che la polente sul taulîr. Ma e pues ancje rompisi in mût elastic, là che e je plui debile, e alore e partìs la lavine.
◆ E alfin, li che al è plui frêt, la nêf no si disfe nancje di Istât, ma e tache a ingrumâsi, un an su chel altri: la nêf plui insot e ven fracade di chê parsore, e piert tant aiar, fintremai che a restin dome bufulutis di aiar cjapadis dentri de glace (830-917 kg/m3). Cussì al nas un glaçâr. E chês bufulis di aiar culì a restin come che a son: cercis di aiar antîc fermadis inte glace. Di chestis bufulis, gjavadis fûr dai glaçârs de Groenlande o de Antartide, o savìn di in maniere precise cemût che al jere fat l’aiar centenârs di miârs di agns indaûr…
◆ Ve ca duncje un miracul di chei che e fâs la nêf: i flocuts pitinins, in graciis di chê forme di stele, a gafarin l’aiar di chês altris etis, lu cjaparin dentri dai glaçârs bocognons par tornânusal vuê e contânus ce mont che al jere une volte. ❚