Une dì la mestre Sunte dal asîl di Cormons e fasè une domande ai frutins:
“Che al tiri sù la man cui che nol è bon di fâ une tombule!”
Dome une frutute, Julie, la plui piçule dal grup, e tirà sù la man e cun timidece e disè:
“Jo no sai fâ lis tombulis.”
Inalore la mestre Sunte si svicinà a Julie e si metè a mostrâi cun tante pazience cemût che e varès vût di fâ par ribaltâsi cul cjâf injù e lis gjambis insù.
A Julie i bastarin pocjis provis par cjapâ confidence cun chel moviment e subit e imparà a fâ avonde ben lis marculis.
Tornade a cjase sô, Juliute e contà dute braurose che la mestre i veve insegnât a fâ lis tombulis di bessole.
A colp si metè sul jet par fâi viodi ae mame e al papà la sô bravece e chei a restarin maraveâts e tant contents che i baterin lis mans.
Dute euforiche di chê sô gnove concuiste, la frutine e volè lâ a mostrâ sul prât di cjase sô l’esercizi ancje aes besteutis che a vivevin di chês bandis.
“Oh ce biel! – al disè l’agnelut Tomâs – o vuei provâ ancje jo.”
Ma al si ribaltà par tiere, fasint ridi ducj.
E vignì la volte de vacje Matilde e il risultât al fo disastrôs.
Si fasè indenant il purcitut Dandul: “Mi tocje a mi!”, ma al colà mâl e al cjapà une biele pache inte schene.
Parfin il mierli Renât e la civuite Marghe a ridevin cui voi.
La cjavalute Aurore invezit e cjalà ma no partecipà propit par no fâ brute figure, e disè: “Brave Juliute!” e e le a fâ une biele corse pai prâts. ❚
Ce biel fâ lis tombulis!
Roberto Meroi
