CULTURE – LA FABRICHE DAI… LIBRIS. L’ultin omaç al Friûl

Il gnûf romanç par furlan di Carlo Sgorlon, Ombris tal infinît, vignût fûr postum par cont de Societât Filologjiche Furlane, al è une opare complesse e ambiziose. Intal libri si cjatin lis tematichis tipichis dal ultin Sgorlon. La storie e je ambientade intun paisut imagjinari  de Basse, dulà che, tai agns ’50, e rive de Persie une profughe curde. La protagoniste principâl e sarà sô fie Eve. La narazion e à come sfont il Friûl dilunc di uns trê decenis, partint de fin dal mont contadin, passant pai agns de contestazion e dal terorisim, rivant a une simboliche, teribile, aluvion che e sierarà il cicli par tornâ a scomençâlu. Chest al è dut câs dome un fondâl smamît pe trame, parcè che ca nol interesse contâ storiis di popui ma impen il davuelzisi des vitis dai singui individuis, il lôr lambicâsi, il sfantâsi dai siums intai lôr faliments.
Lis figuris masculinis a son cuasi dutis cjapadis dentri des sortis di vueris, che a sedin lontan in Persie o chenti cu lis Brigadis Rossis o intal trafic di armis o intune improbabile imprese di afârs, nol impuarte. Dutis a son inutilis e destinadis al faliment. Lui al veve preferît la sô vuere a Itache e cumò Itache no esisteve plui.
Ce sens aie la esistence? Si domande ingosât l’autôr. I oms sono dome un gredei di siums confusionâts jenfri doi infinîts scûrs e misteriôs, vâl a dî prime di nassi e dopo la muart?
Ma nancje cun ducj i presentiments di muart che a jemplin il libri, Sgorlon al rive a jessi pessimist fin in font. Eve, cu la sô sensibilitât artistiche, cul so rivâ a svicinâsi ae nature magjiche des robis, e mostre la sperance: par intant al jere il câs di gjoldi l’interval, sintî il savôr de polse che la vite e regalave.
Un aspiet singolâr dal libri, tignint cont des opinions che l’autôr al à plui voltis pandût cuintri lis politichis di tutele de lenghe, al è il fat che al sedi stât publicât par furlan.
Inte ultime interviste fate de Vita Cattolica, Sgorlon al à spiegât che sintint disi che il Friûl nol veve scritôrs al à volût dâ il so contribût fasint un omaç a cheste regjon e ae sô culture.
La lenghe doprade e somee fie di pensaments e rielaborazions. Si doprin cun bondance i mûts di dî, ancje une vore particolârs e la sielte dai vocabui e je un grum curade, sbrissant pocjis voltis tal manierisim linguistic. Di sigûr no ‘nd è spazi par sperimentazions o contaminazions, ma il risultât, in graziis di une tecniche narative rigorose, al è un lei svelt e slis.
L’esempli di scriture al è magjistrâl ma al è dificil pensâ che al podedi deventâ un model valit pai autôrs contemporanis.
Maurizio Biasizzo