✽✽ La leç su la autonomie diferenziade e chê sul presidenzialisim a tegnin banc inte discussion politiche di chescj mês. La ipotesi di un referendum, aromai imboconade de oposizion di centriçampe cun chê di fermâ la norme, e sarà l’argoment principâl de lote politiche in Italie. Tant che citadins di chest Stât, il risultât al varà un pês ancje su la vite publiche dai furlans, par chest o crôt che il nestri judizi al vedi di jessi net e cence esitazions ancje a cost di jessi calcolâts separatiscj. Chest al è un judizi che al fâs fâ bocje di ridi, ma che al acompagne par altri il moviment autonomist za de sô nassite, cuant che pre Checo Placerean al vignive bolât tant che “austriacant” intai rapuarts de polizie politiche udinese. La robe no nus spaurìs: al è di chê serie di lûcs comuns che si à cirût simpri di emargjinâ e di discreditâ ogni forme di contrast istituzionâl che al metès in discussion la forme dal Stât atuâl.
✽✽ La unitât de Italie e je un “mantra” che al ven dissepulît ancje su chê che e ven clamade “autonomie diferenziade”. I dissepui di Salvini e Vannacci – no stin a clamâju plui leghiscj par no ofindi chei milions di oms e di feminis che a àn crodût intai valôrs di libertât esprimûts dal Carroccio dai siei prins agns -, si acanin a ripeti che chestis leçs a infuartiran cheste unitât. La çampe e berle ae sô dissoluzion, Fratelli d’Italia no fâs un drame, se no eletorâl, pe pierdite di vôts pussibile al Sud, sigure che si trati di une bufule, che anzit e coventarà a rinfuarçâ il podê di control dal guvier su lis Regjons.
✽✽ Parcè che ae fin dai zûcs al sucedarà chest: cundut des peraulonis, des promessis, des cimiadis ai industriâi e aes categoriis produtivis dal Nord, nol cambiarà nuie se no il pês che a cuistaran i ministeris finanziaris romans intal concedi o mancul lis prebendis pal funzionament des gnovis competencis.
✽✽ Gjavìnsi fûr di chest balet.
No lu fasarà la Regjon Friûl-Vignesie Julie, parcè che il president Fedriga nol pues permetisi di discontentâ il so cjapitul, savint che il prossim pas al sarà la pierdite de specialitât e il realizâsi di chel Triveneto suicide, che al è tant cjâr al potent Venit dongje di nô.
✽✽ No lu fasaran i sindicâts locâi, che e je cognossude ben la lôr fedeltât ai uficis “nazionâi”, e nancje i partîts, che aromai ur rivin i ordins sui celulârs. E no lu fasaran nancje lis categoriis economichis. La Glesie? E cirarà di puartâse fûr tra lis dôs opzions cun cualchi consei “discret” par difindi i dirits di chei plui debii.
✽✽ O vin di fâlu nô, cirint chê unitât di popul che nus permetarès di no fâsi strissinâ pe enesime volte intun contrast ideologjic che al tocje i partîts talians.
Cheste e je la vere autonomie, ce separatisim! ❚
