Catalogne, i indipendentiscj no son plui maiorance

L’indipendentisim catalan in gjenerâl al paie lis sôs divisions e la sô conflitualitât interne e in maniere diferenziade al cjape un patafon, intant che a recuperin posizions i socialiscj dal PSC e fintremai il Partido Popular (PP). I risultâts des elezions autonomichis dai 12 di Mai stât in Catalogne a confermin ce che al someave za clâr timp indaûr: che lis mobilitazions che a son stadis fuartis, costantis e massivis, in particolâr tra il 2015 e il 2020, a son ladis al mancul, cun efiets di disgregazion e di riflùs sei a nivel di partît che dentri da moviments sociâi.
◆ La maniere stesse che si à rivât al vôt e je emblematiche. Chês pal rinovament dal Parlament de Generalitat a jerin elezions anticipadis, fiis di chê crisi dal guvier di Barcelone che e jere sclopade za tal 2022 e che e di in chê volte e viodeve in barufe continue i ex aleâts di guvier di ERC (i progressiscj indipendentiscj di Esquerra Republicana de Catalunya) e di Junts per Catalunya (JxCat, la formazion indipendentiste di centri / centridrete vuidade dal ex president Carles Puigdemont). Cun di fat, ai 13 di Març stât, denant de impussibilitât di rivâ a fâsi votâ la finanziarie, il president de Generalitat, Pere Aragonès (di ERC), ae vuide di un guvier di minorance cu la poie esterne dai socialiscj e dai Comuns, la “version catalane” di Sumar, i aleâts dal PSOE a nivel statâl, al à scugnût dimetisi e convocâ lis gnovis elezions.
◆ Propit il so partît al è chel che al à patît di plui, tes urnis, i efiets di chê situazion, passant dal 21,3% al 13,7% e di 33 a 20 puescj tal Parlament. E je lade miôr a JxCat, che al è cressût di passe un pont e mieç (dal 20% al 21,61%) e di 32 a 35 elets, ancje se in realtât nol è nancje chel un risultadon. Di une bande l’atac ae ERC, acusade di jessi «masse colaborative» cul guvier di Madrid, al à puartât cualchi vôt in plui, ma se si ten cont che in chestis elezions no jerin lis listis dal PdeCat (nassût in bande di JxCat e cun chê stesse lidrîs te storiche coalizion autonomiste (Convergencia i Unió, CiU) che tal 2021 a vevin cjapât il 2,7%, par sigûr il partît di Puigdemont nol à rivât a cjapâ ducj chei vôts alì.
◆ Cun di plui ai 12 di Mai la afluence al vôt e je stade plui alte di chê altre tornade, condizionade ancje de clime leade al Covid-19, stant che e je passade dal 51,3% al 57,94%. In chest contest a fasin fieste chei dal PSC (Partit dels Socialistes de Catalunya), la “sezion” catalane dal PSOE vuidât dal premier di Madrid, Pedro Sanchez, che a passin dal 23% al 27,96% e di 33 a 42 rapresentants.
◆ La ande e je une altre, diferente e salacor contrarie de tindince screade tal 2012 e rinfuarcide tai agns seguitîfs, segnade de incressite dai vôt a pro di nazionalitaris autonomiscj e indipendentiscj di diviers orientament e des fuarcis plui a çampe dal PSC. I indipendentiscj e anticapitaliscj de CUP (Candidatura de Unitat Popular) a sbrissin jù dal 6,67% al 4,1% dai consens e a cjapin dome cuatri seçs (prime a jerin nûf) e i Comuns a calin dal 6,87% al 5,82% e di vot a sîs elets. Il vôt catalan, cussì, al è plui “spagnolist” e plui di drete: il PP al recupare chei vôts conservadôrs e anticatalaniscj che timp indaûr a jerin dai Ciutadans (che a disparissin: dal 5,57% al 0,7%) e al moltipliche par cuatri i consens (dal 3,84% al 10,97%) e par cinc i seçs (di 3 a 15) e Vox al cjape cualchi vôt in plui (dal 7,67% al 7,96%) e al manten i siei undis elets. Cun di plui e ven indenant ancje une “drete drete” che si declare catalaniste e i fâs concorence a Vox tal discors cuintri dai imigrâts, la Aliança Catalana, che cul 3,8% e à cjapât doi seçs.
◆ Escludude che je une maiorance nazionalitarie/indipendentiste, tal orizont si viodin dôs opzions pussibilis, ancje se complicadis: une coalizion di çampe PSC-ERC-Comuns o un acuardi tra socialiscj e JxCat. ❚