Sfuei Mensîl Furlan Indipendent
Archivi de Patrie

ATUALITÂT. I mâi no vegnin di bessôi

............

Un plan di ristruturazion di Poste Italiane al previôt intal teritori cjargnel – ma no dome – une «spedade» dai siei presidis, sierant cualchi ufici periferic che al è calcolât no plui reditizi. Su cheste cuistion, a son stadis racueltis tantis firmis di citadins contraris e mandadis in Regjon par che li si cjapàs une posizion fuarte, ma al pâr cence l’efiet desiderât.
Dibant dî che, massime tes localitâts plui disasiadis ,«la pueste» e à une funzion essenziâl massime pes personis anzianis, e chel dai uficis postâi al è un dai ultins presidis sociâi restâts dopo che a son stadis seradis scuelis, glesiis, ambulatoris cun miedis di base sdopleâts di une valade a di chê altre, tais tai colegaments publics, e fermìnsi culì. A Poste S.p.a. (Societât par azions, come la «gnove aghe» di Cjargne, dulà che dome trê comuns a àn vût il coragjo di oponisi ae privatizazion), si sugjerìs, tal câs che e vueli meti in vore il so proposit, di indotâsi di campers e di rivâ almancul doi viaçs par setemane tes localitâts plui piçulis, dant ducj i servizis di un ufici postâl fis: in cheste maniere, si butaressin jù i coscj e si garantirès il servizi. E po, nol è pussibil che propit tal mieç di une crisi economiche cence precedents si colpissin lis realtâts plui debulis. Piçule parentesi: cualchidun che mi disi cuant mai che la Cjargne e vedi vudis «vacjis grassis»… Parcè, prime di cheste crisi jerie par câs bondance? Sierade la parentesi. Bondance di promessis, chês sì, di bande di politicants, cualchi «contentut» ogni tant e nuie di plui. Anzit, la politiche miôr e je stade chê di gjavâ, di mût che la Cjargne e restàs dal dut dispueade. I cjargnei a àn lassât fâ a schene plete, lassantsi «freâ» di sot il nâs la lôr vere anime politiche – la Comunitât montane – cence bati cei. Par dî il vêr, al è stât un  «zîr in tont», ma plui folcloristic che di proteste: chi al coventarès ben altri. Il prossim mês la caravane dal Zîr di Italie – cun dâur i mass media – e passarà pes nestris stradis, il sflandôr de nature e platarà i mâi di une tiere lassade bessole. L’auguri al è che almancul un cartel al «feveli» e al puarti ae atenzion gjenerâl il malstâ culturâl, istituzionâl e sociâl li che e je colade cence vê colpe. Al è impuartant fâsi sintî. Un amì di Fors Disot  mi à dit, l’istât passât: «Ae fin, in Cjargne al restarà dome il campionât cjargnel di balon». Clâr, i ribatarès, no par nuie li al è il guvier in lûc.
DINO TEMIL

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +