ATUALITÂT. Une radio libare e soredut… furlane

Un mieç di comunicazion che al è stât no dome un spieli des trasformazions dal Friûl ma ancje un veicul impuartant di sperimentazion linguistiche, didatiche e culturâl, che al à contribuît a cambiâ la imagjin che i furlans a vevin di se stes. Radio Onde Furlane, che e à tacât li sôs trasmissions ai 2 di Fevrâr dal 1980, e je stade fondade di bande di un grup discompagn di personis, che al tignive dentri autonomiscj, militants di Democrazia Proletaria e catolics moderâts. Dutis chestis personis, fin dal principi, a vevin tant che obietîf chel di vierzi un spazi libar e atent ai problemis de societât, e al è propit cussì che Onde Furlane e je deventade un impuartant pont di riferiment pes bataiis civîls e un centri di agregazion creative (no par nuie e je stade propit Radio Onde Furlane a proponi al public, pe prime volte, il telegjornâl par furlan e il prin sît internet in marilenghe). A tacâ di chei che a àn inviât il progjet (Sergio Venuti, Silvano Pagani – prin president di Radio Onde Furlane –, Federico Rossi, Mauro Tosoni, Giorgio Cavallo, Maurizio Florissi, Elia Mioni, Elio Fedele, Maurizio Staderoli, Oriella Mion e Roberto Meroi), a son stadis tantis lis personis che a àn contribuît, insiemit ae redazion e ai colaboradôrs, a fâ di cheste radio un mieç di comunicazion bon di contâ il Friûl. “Fin al ’96, tirâ sù bêçs par fâ cressi la radio no je stade une imprese facile – al conte Pauli Cantarut, preseât president di cumò – i finanziaments a vignivin soredut di bande dai citadins, de publicitât e dai finanziaments europeans. Daspò dal ’96, invezit, in gracie de leç di tutele des lenghis minoritariis, o vin podût finalmentri dâ ae radio une struture”.
Elisa Michellut