ATUALITÂT. Bon complean, Onde Furlane!

Cemût isal rivât Mauro Missana a Onde Furlane?
In doi moments, in realtât. Il prin cuant che e je nassude la radio, tor dal 1980 plui o mancul. O ai fatis un pocjis di trasmissions e dopo o soi lât di gnûf a torzeon pes radios e pes televisions. O soi tornât intal ’92. Dal  2000 o lavori culì in maniere continuative.
Cemût mai âstu fate la sielte lavorâ intune radio che e dopre une lenghe minorizade?
Pes lenghis – a nivel tecnic o di contignûts – no je diference, ancje se sul imprin nol è stât sempliç traspuartâ par furlan  robis che o vevi simpri fat par talian. Dut câs, o ai di dî che mi à judât tant il jessi lât ator: mi à dât basis che o ai puartât in cheste esperience.
30 agns di OF: se tu vessis di spiegâ cheste esperience a di un zovin di 15-20 agns, nassût al inizi dai ’90, ce i disaressistu?
Onde Furlane e je une radio che e trasmet ancje musiche, il trait d’union fra lis gjenerazions: no si pues pratindi che un fantat di 15 agns si interessi totalmentri dal teritori li che al vîf. Achì al cjate bielis stiçadis par vivi miôr il rapuart cu la sô tiere, restant viert a dut il mont. Cheste no je la radio di so nono, e je une radio ancje sô parcè che a 15 agns, ancje se cun calme, al à di preparâsi a une vite di adult. Onde Furlane i pues dâ une grande man in chest.
Puedistu provâ a fâ un piçul belanç di chescj 30 agns?
Al è dificil fâ un belanç, parcè che tu dismentearâs simpri alc… E je partide parcè che e jere la volontât di contâ il teritori. E je stade une sfide doprâ il furlan, ancje se po si à doprât ancje il talian o il castilian o lis lenghis de imigrazion. Onde Furlane e à stiçât la curiositât dai siei scoltadôrs, ancje se no son mancjâts i moments dificii. Atacs a ‘nd vin simpri vûts, ma e à vût ancje reazions un grum fuartis. Di chê altre bande, no tu contentarâs mai ducj, però tu riscjis di contentânt tancj di plui di ce che al somee rispiet a altris media.
Cuai sono stâts i ponts di fuarce di Onde Furlane?
Pal sigûr la organizazion di events come il Premi Friûl, lis cunvignis, la colaborazion cun Festintenda e il jessi  pardabon un pont di incuintri par tantis associazions: un barcon, un dai pôcs, li che a puedin fâ alc.
Lis associazions àno disvilupât une sensibilitât plui alte pe cuestion de lenghe furlane?
Sì, dal sigûr. Prove dome a pensâ al setôr des gnovis migrazions, par esempli. A ‘nd è cetantis personis che, rivant di fûr, in gracie des nestris trasmissions a àn cjatât un pont di contat cu la realtât dal Friûl.
Cemût viodistu il futûr?
Al è simpri dificil fâ previsions. Chest an o vin decidût di tornâ a sparniçâsi tal teritori. O fasarìn cualchi cunvigne, ma ancje incuintris in cjasis privadis par fevelâ dal Friûl di vuê e dal Friûl futûr. Un mût par cirî un contat diret cui scoltadôrs cu lis fuarcis che o vin a disposizion: nô cun pôcs mieçs o fasìn robis che di altris bandis a fasin struturis publichis e magari cun tancj dipendents.
Matieu Fogale