Sfuei Mensîl Furlan Indipendent
Archivi de Patrie

LA INTERVISTE. Design e comunicazion

............

Design e je une des peraulis jentradis cun prepotence tal lessic usuâl des ultimis gjenerazions. Ancje se e je une peraule che e ven doprade di scuasi cent agns e dispès in maniere no corete, se rapuartade al so vêr significât. Di fat, tal us comun, cul tiermin design si intint un ogjet fat intune cierte forme, doprant massime parametris estetics e emozionâi, carateristiche cheste che e rispuint dome in part ae veretât. «Biele chê pene: si viôt che e je di design!», intindint cun chest un ogjet fat in mût origjinâl rispiet a altris che si doprin avuâl, sedi dal pont di viste estetic che funzionâl (tal câs de pene, ancje une sô ergonomie tal cjapâle in man, par esempli), magari vignût fûr dal cjâf di un architet, miôr ancjemò di un archistar. Chest al è just dome in part, parcè che cul tiermin design no si intint dome il dissen dal ogjet ma la sô industrializazion che e ten cont di altris parametris, tant che il podê jessi fat di cierts materiâi, a cierts coscj di produzion e di vendite… Duncje, un ogjet di design nol è dome un ogjet di concezion o di forme gnove fat par plasê (carateristiche cheste cetant impuartante) sedi tal presentâsi che tal jessi doprât, ma che al pues jessi industrializât, ven a stâi prodot in plui copiis par jessi pandût al public.
Il tiermin design al è stât doprât pe prime volte in Americhe, tai agns Vincj, co la Ford, che e produseve nome che une machine – la Tin Lizzie di colôr neri – si è cjatade a frontâ la concorince de Chevrolet e e à scugnût tacâ a produsi no dome machinis di plui colôrs ma ancje plui comudis. In dì di vuê, il design al è un component impuartant te produzion di un ogjet sedi piçul (un spacetin di dincj) che grant (un complès architetonic). Cjapait par esempli lis cjadreis: ogni sante dì, al salte fûr cualchi model gnûf e al è impensabil – e no dome par chei che a puedin economichementri ma par ognidun di nô – comprâ nome lis cjadreis di paie dal ultin dopovuere che a jerin in ogni famee. Ognidun di nô al pratint di vê une sielte, e che cheste e esprimi la sô personalitât. La conseguence e je la costante che aromai a son simpri plui i ogjets a rapresentânus (une cierte borse, la sielte di une cierte taule e de firme che le prodûs…), tesi cheste ben pandude tal libri «Marketing moving: l’approccio semiotico» di Giulia Ceriani (ed. Franco Angeli). Il design al è deventât une sorte di comunicazion che al à fat dî al innomenât architet Michele De Lucchi (Memphis Group) che la comunicazion e je zaromai la cuarte dimension e che e va zontade aes trê canonichis di lungjece, largjece, profonditât.
Par savênt di plui scjariait il pdf in www.furlanfriulano.eu sezion didatiche.
SANDRI DI SUALD

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +