La autonomie dal Friûl-V.J. e passe pe Cjargne…

Ben, no si po dî che la Cjargne no sedi rapresentade… Intun dai puescj plui impuartants de politiche nostrane a son sentadis dôs personalitâts di venti sù. Te Comission paritetiche, dulà che Stât e Regjon Friûl-Vignesie Julie a discutin, o miôr a varessin di discuti, sul statût de autonomie de nestre Regjon e si confrontin e si scuintrin pes normis di atuazion di chel stes statût, a son stadis nomenadis dôs feminis che a vegnin des nestris monts: la avocate Elena Dorlando, che e jere za presidente di chê comission e che e je stade riconfermade, e la on. Aurelia Bubisutti.
◆ Un grant risultât che nus fâs ben sperâ pe Cjargne ma ancje pal Friûl.
◆ Incressi i margjins di autonomie de nestre regjon al sarès un grant biel risultât.
◆ Al sarès impuartant che a rivassin, par esempli, a puartâ cjase di Rome la competence primarie su la istruzion, su la scuele, magari copiant, lôr che son ‘montagnulis’, di chês altris Regjons alpinis a statût speciâl come il Trentin-Sudtirôl e la Val di Aoste.
◆ Parcè a lôr sì e a nô no? Parcè àno plui autonomie di nô?
◆ Ce i costial al Stât intun an la scuele dal Friûl-Vignesie Julie? 800 milions di euros? Po ben, che Rome nus ai garantissi e che nus lassi fâ a nô, tai programs, te gjestion dai docents e in ducj i compits de burocrazie scolastiche. E sarès une biele sfide pal ufici scolastic regjonâl, pai Comuns e par dute la aministrazion regjonâl.
◆ E nô Furlans o saressin contents di dî une volte di plui “Gracie” aes dôs cjargnelis e a dute la Cjargne che e je pûr simpri la mari dal Friûl. ❚