La presentazion dal volum
ai 13 di Dicembar
Ducj i letôrs de “Patrie” a cognossin Erika Adami, che e je stade diretore di chest sfuei e lu à indreçât in maniere professionâl e moderne viers dai temis di discussion plui atuai e ferbints. Cuant che Erika e à decidût di frontâ gnovis sfidis lavorativis, la “Patrie” e à volût cun fuarce domandâi di continuâ a fâ viodi su lis pagjinis di chest sfuei dute la sô atenzion pes tantis feminis che in plusôrs setôrs a tegnin alt il non dal Friûl. Dispès lontan de lûs dai rifletôrs, des atenzions dai mieçs di comunicazion, a lavorin cidinis ma a dan prospetive e valôr ae lôr ativitât, aes lôr esperiencis, aes lôr aziendis e ae lôr tiere.
◆ A son “Feminis furlanis fuartis”: cussì o vin clamadis lis figuris che a marchin ancjemò di plui, in dì di vuê, la centralitât dal rûl feminin inte storie furlane, e che Erika nus à presentât mês par mês cuntune profonditât e une sensibilitât che a son pardabon raris. I lôr ritrats a son deventâts dal 2020 incà une des rubrichis classichis e plui letis e comentadis dal nestri gjornâl. Par chest, inte golaine “La machine dal timp” nus à parût just cjatâ un spazi par tirâ dongje intun libri une selezion dai articui jessûts.
◆ Il volum al sarà presentât ai 13 di Dicembar, inte zornade di Sante Luzie, aes 18 a Palaç Antonini. A discori dal libri cun Erika a saran Cristiana Compagno, Martina Delpiccolo, Rosalba Perini e Carlotta Del Bianco. Us spietìn ducj. ❚
