✽✽ Salacor no si sin inacuarts in timp, e pûr o varessin vût di notâlu prime, e cun grant pinsîr, che il tiermin “popul furlan” si lu dopre aromai di râr. Al sarà par vie de difidence che o vin par une altre espression tant che “populisim”, deventade simbul di politichis conotadis di razisim e intolerance, o al sarà parcè che intal pinsîr de çampe al à rapresentât simpri une vision interclassiste de societât, ma il risultât nol cambie, par colpe di une vision ideologjiche ancorade ai schemis dal passât.
✽✽ E e je une contradizion. Dispès mi fermi sot de Loze dal Lionel a Udin a lei la lapide che e ricuarde lis motivazions che “Al Friûl e par chel ae citât di Udin, e ven concedude la medaie di aur al valôr militâr. Fedêl aes tradizions dai paris, cu la volontât di riscatâsi de tiranide e di rinassi ae libertât, il Popul Furlan, dopo dai 8 di Setembar dal 1943 al deve sù compat cuintri de opression todescje e fassiste, sostignint par 19 mês une lote che e sa di liende”. Duncje, jessi calcolâts popul in ciertis circostancis al va ben, in altris si lasse pierdi, come se, dome a nomenâlu, si podès fâ nassi suspiets di iredentisim.
✽✽ Al è come se a ogni sentence di tribunâl fate “in non dal popul talian”, cualchidun al provàs a cidinâ il judiç che le mande fûr, preocupât pe potenzialitât “rivoluzionarie” di chês peraulis.
✽✽ In efiets al è vêr parcè che se un popul al cjape cussience de sô fuarce, no je dighe che lu fermi, massime cuant che lis autoritâts, lis istituzions no corispuindin plui ai siei dibisugns, aes sôs aspirazions: ven a stâi, cuant si sint tradît. Prin di dut al bandone il sisteme di rapresentance, o ben nol va plui a votâ, dopo dispès al cêt ai compliments dal prin demagôc che al cjate, e al salte fûr scuaiât, o fintremai tibiât intai siei dirits fondamentâi, agnel sacrificâl de storie.
✽✽ Par chest jo o crôt che o vedin di tornâ a apropriâsi cun fuarce e convinzion de definizion di “popul furlan”, rimarcant tropis che a sedin stadis e che a continuin a jessi lis provis par anulâlu, batint su lis diversitâts, doprant confins aministratîfs, particolaritâts linguistichis, falsetâts storichis par dineâ la sô unicitât, e fintremai la sô esistence.
✽✽ “Io sono Friuliveneziagiulia” nol è che la ultime operazion mâl nassude in chest sens. Atenzion però che, a fuarce di ribatilu in ogni salse e in ogni ocasion, nol è di sotvalutâ il pericul che al puedi influençâ il pinsîr comun.
✽✽ O sin un popul, ciert, ma dome la cussience di jessilu nus pues rindi protagoniscj. ❚
