Il guvier spagnûl al domande che catalan, basc e galizian a sedin lenghis uficiâl de UE

Lis elezions politichis dai 23 di Lui stâts tal Ream di Spagne a àn confermât la polarizazion fuartonone che e jere za in vore tai mês passâts, ma si à sfantade la pussibilitât di vê al guvier une coalizion de diestre spagnoliste. Cun di fat, cundut che il Partido Popular (PP) al è il prin partît cun 137 sentis intal Congrès dai Deputâts (e 120 intal Senât), in parlament no son vôts avonde par meti adun une coalizion cun Vox e cun altri fuarcis conservadoris. Di chê altre bande, il Partît Socialist di Pedro Sanchez al à tignût bot e fintremai al à vuadagnât vôts, intant che la aleance di çampe Sumar no à rivât a infuartîsi. Pai partîts nazionalitaris lis robis a son ladis in maniere diferente: ben pe coalizion nazionalitarie e progressiste basche EH-Bildu (EHB) e pai centriscj catalaniscj di Junts per Catalunya (JxC), avonde ben pai progressiscj galizians dal Bloque Nacionalista Galego (BNG) e pal Partît Nazionalist Basc (EJA-PNV), che però al à pierdût consens in direzion sedi dai socialiscj che di EHB, e no masse ben pe çampe catalane di Esquerra Republicana de Catalunya (ERC), che a àn pierdût vôts in maniere avonde significative.
◆ In cheste situazion, a nivel statâl, par lâ al guvier si à di vê la poie, almancul inte forme de astension, propit di autonomiscj e indipendentiscj. Denant de sielte tra un gnûf esecutîf a vuide socialiste e un cun prin ministri Alberto Núñez Feijóo dal PP, chei di çampe no àn masse dubis e cun lôr ancje i bascs di EJA-PNV. La astension dai progressiscj bascs, catalans e galizians e la poie esterne di EJA-PNV, però, no son avonde, ma a coventin ancje i vôts a pro (o i vôts “no cuintri” – almancul un… – ancje di JxC, il partît dal ex president Carles Pujdemont). Par chel, vie pal mês di Avost, i socialiscj spagnûi e soredut chei dai Paîs Catalans a àn inviât un confront cun ERC, EHB, EJA-PNV e cun JxC. Tal moment di lâ in stampe cun chest numar de Patrie no savìn ancjemò cemût che e larà a finîle pardabon, però juste dopo de Madone di Avost a son saltâts fûr i prins efiets di chestis tratativis, che no tocjin dome i ecuilibris politics e istituzionâi internis dal Ream di Spagne ma che a rivuardin soredut lenghis e dirits linguistics e che a àn une proiezion europeane.
◆ Ai 17 di Avost stâts la socialiste maiorchine, Francina Armengol (te foto), e je stade elete tant che presidente dal Congrès dai Deputâts. La ex presidente de Comunitât autonome des Isulis Baleârs e à cjapât 178 vôts – ducj chei dai deputâts di çampe, centriçampe e dai partîts nazionalitaris – intant che i vôts de diestre spagnoliste si son dividûts tra la candidade dal PP, Concepción Cuca Gamarra, e chel di Vox, Ignacio Gil Lázaro. Juste dopo de sô elezion, Armengol e à palesât la sô volontât di garantî inte Cjamare l’ûs des lenghis couficiâls a nivel teritoriâl (che a son za presintis in cualchi maniere tal sît web dal Congrès): in chel istès une manifestazion di sensibilitât personâl – stant che la gnove presidente e rive di un teritori di lenghe catalane – e un segnâl politic cuntun significât plui fuart.
◆ In chê stesse dì, il ministri pai afârs forescj dal guvier ancjemò in vore, José Manuel Albares, al à fat indenant la richieste formâl di Madrid par che il catalan, il basc e il galizian a vegnin ricognossudis tant che lenghis uficiâls de Union Europeane (UE), dongje di chês altris vincjecuatri che a àn za chel status. Une iniziative dal gjenar e jere stade inviade za tal 2005 de bande dal guvier vuidât di José Luis Rodríguez Zapatero, ma no veve vût nissun efiet. Il percors al è dificil e complicât e al covente il vôt a pro di ducj i Stâts de UE. Viodarìn ce che al nas. ❚