Riflessions su la Zornade Mondiâl de Zoventût di Lisbone

A Lisbone, dal prin al 7 di Avost, pe ZMZ – Zornade Mondiâl de Zoventût (GMG, par talian), a jerin presints un milion e cinccent mil zovins e zovinis rivâts di dusinte stâts dal mont, e ju onoravin vescui, cardinâi e pape Francesc: un incuintri di lenghis, culturis, usancis e mentalitâts dadis dongje tal non dal mestri e profete Jesù. Cualchidun al berlarès: “Une grande soflade dal Spiritussant e un segnâl evident che lis gnovis gjenerazions a sintin la religjon”.
Chês placis, glesiis, splanadis deventadis un furmiâr di zoventût, chês zornadis colmis di ligrie e di colôrs, lis ai sintudis come une splendide sagre, imagjin moltiplicade par mil o par un milion di voltis, spieli di chês sagris che si fasevin tai nestris paîs fin a cualchi an indaûr. E jere la Fieste dal perdon: tridui, confessions, messe cjantade, predicjadôr forest, procession, pescje di beneficence e i zûcs in place, soredut pe zoventût. Se si zontave il bal a rivavin i fulmins e i tons dal plevan. In chês zornadis, ducj smenteave lis disgraciis, dut al deventave fieste e ligrie, almancul par une dì. Tal indoman, ognidun sarès tornât a siei fastidis, crôs e miseriis di cheste val lagrimide.
◆ Tal gno paree, la ZMZ e je stade une grande sagre tradizionâl organizade pulît.
Personalmentri, mi sarès plasût che tal prin incuintri, propit par rispiet dai zovins, un rapresentant uficiâl de glesie al ves dit: “Cjârs zovins e zovinis des ultimis gjenerazions, no si us viôt plui tes nestris glesiis e messis. O sin dal parê che o cjacarìn doi lengaçs diferents e che no rivìn a capîsi. O vin dibisugne di scoltâus cun tant rispiet e libertât. In chestis zornadis judaitnus cu lis vuestri riflessions e propuestis a intindisi e a riconciliâsi”.
◆ Al sarès stât un grant, sincîr moment di liberazion par ducj; sodisfat ancje nestri Signôr.
Lis imagjins des celebrazions a àn presentât une glesie a piramide: su la spice pape Francesc, plui insot i cardinâi, daspò vescui, predis e tal zocul a tiere la zoventût. Pape Francesc tai siei insegnaments di agns incà al volte la piramide cu la spice par tiere e il zocul insù: prime il popul di Diu (tal nestri câs i zovins, mestris par une dì), e la autoritât a servî, a disposizion. Ma chest, tes imagjins di Lisbone no si lu à olmât.
◆ Tai discors, e jere miôr cualchi peraule di mancul su la Madone ‘influencer’ e su la ecologjie integrâl e cualchi peraule di plui sui misteris principâi de nestre fede.
◆ In chescj agns, la glesie catoliche in Italie e tal mont e je impegnade te celebrazion dal Sinodi: un event che al cjape dentri tune consultazion gjenerâl dut il popul di Diu. Chest, par dâ une rispueste di Vanzeli aes domandis e esigjencis de societât postmoderne; constatazions e riflessions par grandis decisions su la relazion laicât jerarchie, celibât dai predis, diaconât aes feminis, dirits lgbtqi+, il flagjel dai abûs di ogni sorte, dialic fra lis religjons, une glesie inclusive di ducj e vie discorint. Cemût no coinvolzi in dut chest la opinion di un milion e mieç di zovins? Il parê indispensabil des gnovis gjenerazions par une vision gnove di glesie? A Lisbone a son stadis fatis testemoneancis bielis che a tocjin il cûr, ma la testemoneance no sostituìs la libare riflession. Une consultazion dai zovins e varès fat un grant ben aes nestris jerarchiis e e sarès stade benedide de opinion publiche dal mont intîr.
Ocasion mancjade.
◆ A jerin presints a Lisbone tresinte zovins de nestre diocesi; si son cjatâts par cualchi zornade come trutis di flum tes corints di un ocean multietnic, multiculturâl, multilengâl. A jerin ducj a bracet e ducj compagns tal rispiet des diferentis etniis, mentalitâts, usancis, storiis e tradizions. In plui i zovins e lis zovinis de nestre diocesi, impussibilitâts a partî par Lisbone, si son dâts cunvigne tun lûc particolâr: a Tarvis, crosere e simbul dal incuintri de culture latine, todescje e slave.
◆ O speri che cheste zoventût e sedi tornade cjase cuntun spirt gnûf, cul gust di cjacarâ furlan o sloven o todesc a seont dai paîs li che si cjatin e cu la passion di cognossi la nestre storie di popul e di glesie. Al è ridicul jessi internazionâi, globalizâts, pierdint la proprie identitât e muse.
◆ Pape Francesc al à dedicât la ultime mieze zornade par ringraciâ i vincjecinc mil volontaris e volontariis che in chel scjafoiaç a àn sudât siet cjamesis par metisi a disposizion di ducj. Se un valôr al à di rivâ de ZMZ al è chel dal volontariât. I nestris zovins, prime che volontaris di associazions, che si metin a dâ une man aes nestris comunitâts simpri plui debilis e emargjinadis. I nestris paîs a àn dibisugne urgjente di volontariât, comprendudis lis parochiis aromai cence plevan e cu la glesie sierade.
◆ Al dîs il Vanzeli: l’arbul si lu cognòs des pomis; il risultât de ZMZ, positîf o no, si lu viodarà in pratiche tai paîs. E cui zovins, tocje simpri sperâ in ben. ❚