Castoie e je une piçule borgade di Paulâr indulà che a vivin dut il timp dal an dome dôs personis di 87 e 60 agns. Dai 21 di Mai, la popolazion e je cressude cu la famee di Deborah Ciani che e à viert la aziende agricule e agriturisim “Savôrs di Castoie”.
◆ “La mê bisnone – e conte Deborah – e jere origjinarie di chi, e nô o sin a stâ inte sô cjase. Mê mari e je culì dal 2020, cuant che e je lade in pension; gno pari in curt al vignarà ancje lui fis cun nô; il gno morôs lu ai cognossût achì, stant che al à une cjase indulà che al passe lis feriis: le vin sistemade un pôc zontant il bagn che nol jere. I miei nonos a jerin di Lambrugn, localitât dongje de pissande di Salin. L’agriturisim e il pont vendite dai prodots a son logâts in dôs cjasis: une e jere di un gno parint, e chê altre le vin comprade. Mi displaseve viodi une cjase cul cuviert colât dentri propit tal mieç dal paîs, e mi disevi “o scuen rivâ adore di fâ alc”, e cussì e je lade. O sin partîts cu la ristruturazion midiant di un contribût regjonâl. Par fortune i lavôrs ju vin fats prime dal 110, parcè che dopo i presits des materiis primis a son cressûts dal 60%. Fâ i lavôrs ca sù al è stât complicât parcè che la strade e finìs subit prime di dulà che al scomence il borc. Gno pari al à puartât jù inte plaçute cu la motocariole un cavol di materiâl demolît!”
◆ La ativitât e restarà vierte fin ai 24 di Setembar. Dopo a vignaran fats altris lavôrs di ristruturazion. Ma al somee che al vedi valût la pene puartâ indevant cheste idee: “rivant sù de scjalinade de cleve e je la fontane e subit dongje un biel volt – e va indenant Deborah –, passât il volt, o sin nô. Secont me e je une energjie particolâr cuant che si passe il volt… al somee di jentrâ intun altri mont! Lontans dai rumôrs dal mont.”
◆ La aziende agricule e prodûs alc di dut: pomis, plantis aromatichis e oficinâls, verdure dal ort. “Dut in version ridote, al è clâr – e dîs Deborah –. O vin i cjamps achì dongje, sparniçâts ca e là: cualchidun lu vin ereditât di gno nono e altris ju vin cjolts a fit. Putrop o vin tancj cjavrûi e cierfs che nus zirin ator, nus fasin il control de cualitât dai prodots dai cjamps e dispès no nus lassin nuie! O varìn di meti une spaltade tor ator di chescj cjamps. Par fortune o ’nd ai un ancje a Morùs – dulà che o jeri a stâ prime – che mi pues garantî une cierte continuitât di produzion ancje di Invier. I prodots a son dal dut biologjics, ancje se la certificazion, par colpe de burocrazie, le varìn tra un pôcs di agns. O vin completât di pôc il laboratori par fâ marmeladis, trasformâts, secjâts, strucs e sotasêt cui nestris prodots. Pal moment no vin inmò tante produzion, par vie dai lavôrs che nus àn tignûts indaûr. Ma dal an cu ven o sarìn plui operatîfs.
◆ O vin la disponibilitât di fitâ dôs cjamaris matrimoniâls, une cusine e un bagn. Dal Mês di Mai indenant o vin vût diviersis prenotazions: int di Milan che e à stât 15 dîs, cumò un siôr che al sta 4 dîs, un pôc di timp fa i vin vût zovins de Gjermanie che no sai cemût che a son rivâts fin ca di nô… No vin metût ancjemò nissun cartel e nissune segnaletiche e no vin fat inmò publicitât… Di Mai indenant o vin vût une medie di 10 personis in dì intal fin setemane a mangjâ tal agriturisim… Ai 15 di Avost a àn zirât un 60 di lôr… O sin contents dal risultât!
◆ Tal agriturisim si puedin gustâ diviers plats che ju prepare mê mari, e il menù al cambie ogni setemane: frico, gnocs, taiadei fats cun farinis di forments antîcs che ju comprìn intes aziendis agriculis ca dongje. L’an cu ven o zontarìn i cjarsons.”
◆ L’invît di Deborah al è chel di lâ a cognossi i “Savôrs di Castoie”, no dome par riscuvierzi i guscj di une volte dai mangjâs fats in cjase, ma ancje par svicinâsi di plui ai savôrs de amicizie e dal stâ insiemi, e par sintî la energjie positive di chest lûc un pôc dismenteât. https://www.facebook.com/SaporidiCastoia ❚
