Sfuei Mensîl Furlan Indipendent
Archivi de Patrie

Al è rivât il sît li che si cjatin dutis lis sagris dal Friûl, biadelore!

Dree Venier
Tomas “Uolli” Marcuzzi ae sagre di Fraelà di chest an

Interviste cun Tomas “Uolli” Marcuzzi,
regjist e grafic apassionât di sagris, che al à metût in vore
dute la sô “cognossince” creant un sît li che si cjatin
ducj i apontaments in Regjon: «sagrefvg.it»

Tomas “Uolli” Marcuzzi, classe 1978 di Tissan, grafic e regjist di videoclips publicitaris e musicâi, di là de grande passion pal sô lavôr che lu sta rindint innomenât, a ’nd à une altre: lis sagris. Nus conte di cemût che al è nassût il so sît «Sagrefvg.it – Appuntamenti e recensioni delle sagre in Friuli-Venezia Giulia a cura di Uolli» (cun da pît il slogan «Vincono solo i biglietti rossi»). Il sît al è une vore complet, cun recensions di ogni sagre e coments spiritôs.
_
Tomas, prime fevelìn di te: ce studis âstu fat par deventâ autôr di videos? Il classic “Sello”?
Esat, il classic Istitût di Art «Sello» di Udin! Ma chel che mi à dât in man i imprescj pal mistîr di grafic al è stât un cors di specializazion post diplome al Enaip, dulà che fra l’altri cumò o insegni. Un cors cun tant di permanence di studi a Londre e la pussibilitât di imparâ a doprâ il computer, che al Sello in chê volte nus al vevin juste fat viodi. In gracie di chel bagai di cognossincis o ai tacât a lavorâ ator pal Friûl par variis studis grafics.
_
E la cariere di videomaker cuant ise rivade?
Cuant che, avonde stuf dai lavôrs che o fasevi, o ai tacât par gno cont a interessâmi di videografiche, montaç, animazion, imparant bessôl i programs che coventavin a fâju. A chest si è zontât il fat che in chei timps o sunavi musiche eletroniche: il gno sorenon “Uolli” al jere il non dal gno prin grup. E cussì al è stât propit par une mê cjançon, «Ippocastano», che o ai fat il gno prin video animât. Un esperiment, che però al è stât selezionât pal Museek Festival di San Pietroburgo.
In Friûl lu à viodût il grup dai Amari, che mi àn domandât di fâur un video a lôr, che a jerin cognossûts tal mont de musiche, e cussì a son vignudis altris propuestis e si è inviade cheste “cariere”. Dopo dal festival di San Pietroburgo di «Ippocastano» o pensi che no si visi plui nissun (al rît, ndr)!
_
Un sium che al deventave vêr…
Sì, ten cont che no mi interessave fâ il regjist di cine. Jo o ai simpri vût chê di fâ videos musicâi, i famôs viedoclips. Une sorte di Gondry furlan (Michel Gondry al è un innomenât video regjist, ndr).
_
Tai tiei videos si viodin tancj paisaçs di chenti, ise une manifestazion di amôr pal Friûl?
Chel pal Friûl al è amôr, ma fin ai 25 agns, cun ancje odi. O volevi lâ vie di un puest li che no viodevi stimui artistics valits. Un teritori bielon tant che nature, la vite che si fâs mi plâs, ma il nivel culturâl par musiche, art e vie indevant al jere tant bas. Ai furlans i interessin altris robis. Cumò la ande artistiche no je cambiade tant, ma mi soi cuietât: o ai viazât, o ai viodût altris robis, e o presei chel che si cjate ca. Par me il Friûl al è un puest sincîr, sclet. Ancje robis che timp indaûr lis calcolavi kitch, cumò o consideri che a àn une lôr bielece spontanie. Ve chel che al pues jessi un fîl comun tra la mê ricercje artistiche e lis sagris o frascjis: jo o ami la bielece inocente, chê costruide e pensade no mi plâs. La part folcloristiche dal Friûl e je ancje une ispirazion artistiche.
_
La provincie ise une sielte? Di un videomaker si spietisi che al sedi a stâ a Milan.
In tancj mi àn dit cussì, ma jo o stoi benon in Friûl pai motîfs che ti ai spiegât. Cun di plui, no podarès vivi intun puest che o sint masse costruît tant che Milan. A mi mi plâs il vueit, i spazis: o cjati plui ispirazion a cjalâ une fuee tal bosc mote dal aiar, pluitost che tantis situazions stimadis “creativis”.
_
E alore vignìn a lis sagris! Cemût isal nassût il sît?
Al è sucedût par vie di un gno sbroc su Facebook: mi lamentavi che nol esist un sît complet cun dutis lis sagris in Regjon. O pensavi che al fos dome un gno lambic, ma a son tacâts a rivâ un grum di coments, sugjeriments, e si viodeve une passion grandonone par chescj events. Chest lu à notât ancje il gno amì Fulvio Romanin, che al fâs sîts, e intune setemane a ’nd à costruît un disintmi «e cumò jemplilu!»: podevio tirâmi indaûr? E cussì, o ai passât cualchi gnot a cjamâ sagris sul sît (al rît, ndr).
_ Des recensions che tu fasis al somee che tu lis cognossis dutis! Eh, prin di dut tu âs di savê che jo o cognòs il Friûl di lunc in larc parcè che o jeri usât a zirâlu cui miei gjenitôrs, ancje lis sagris. Zonte po che o ai vût il periodi di zovin “salvadi” che a ’nt fasevi ancje trê par sere, e ve ca: tal 75% des sagris che o publichi o soi stât. Di chês che no cognòs mi documenti, o sgarfi, o domandi par meti dentri particolârs par fâ capî il lôr spirt.
_
E dut cuinçât cun ironie, cun batudis spiritosis.
Ben, o varès gust di cambiâ mentalitât a cualchidun che si suste par cualchi comentut, massime la int plui anziane no capìs il spirt. A àn di capî, e plan a planc o rivarai, che lis batudis a son detadis di un grant afiet, e no par coionâ. Se o ves di fâ recensions neutris par no scontentâ nissun, pluitost o moli dut.
_
Fin cumò si à fevelât di Friûl, ma ae fin il sît si clame «sagre… fvg»! Coventie simpri efevugjizâ dut?
O sin une Regjon, o volevi fâ une robe vierte. E fasint cussì o ai scuviert che a son par esempli tantis sagris ancje sul Cjars: magari no àn lis carateristichis des nestris, ma la partecipazion e je sintude.
_
Il to sît al à un unic difiet: disvelâ puescj che dopo magari si ruvinin se e rive masse int… No âstu rimuars?
Al è un pinsîr che mi è vignût, ancje jo in passât o jeri un tic cussì, mi tignivi la robe biele par me (al rît, ndr). Ma ti siguri che la int e je pegre, ancje se tu i dâs bogns conseis no si môf. Nissune sagre si jemplarà pes indicazions di Uolli, ancje se cualchidune mi à za ringraciât parcè che a àn vût cualchi persone di plui.
_
Par finî, il podi des tôs sagris preferidis.
Prime, chê di Clavaiis, anzit “ Clavaias”, in Cjargne: mangjâ di diu, une location magjiche tra lis monts, e ancje parcè che a fasin i crostui di Istât. A Clavaiis si fasin dut l’an: lant ator a sagris si scuvierzin chestis particolaritâts. Seconde, Vidulis: rapresentante de categorie des “sagronis”. Ven a stâi di chês grandis cun tante int, sul stamp di Cjarpât o Maian, ma che e je rivade a mantignîsi plui “vere” e sincire. In tierce posizion o met Cjassà, cun cjarsons ecezionâi in menù e in gjenerâl une ufierte gastronomiche siore, o segnali ancje il lôr frico. No ducj a san che a Cjassà e esist une sagre di grande cualitât.
_
Prossim pas, un sît cun dutis lis frascjis?
Cemût âstu fat a capîlu? ❚

::::::::::::::::::::::::::::::::::::::::::::::::::::::::::::::::::::::::::::::

FOCUS. Piçul viaç te produzion video di Uolli

I video di Tomas “Uolli” Marcuzzi a son oparis mai banâls, simpri cuntune idee, un paisaç, un zûc visîf che ti stupìs o che ti fâs insumiâ. Uolli al puarte indevant une poetiche dute sô. Cheste “intransigjence” e fâs di mût che nol lavore a cualsisei progjet, al à di sintî une afinitât cul autôr che al lavore cun lui. Di fat, in cjamp musicâl al è famôs cualchi so “no” a cjantants impuartants.
◆ La maniere miôr di fâsi une idee e je lâ su YouTube e cjalâsi i siei videos musicâi.
◆ O podês tacâ cul prin, citât te interviste: «Ippocastano» (Uolli), di aromai uns 14 agns fa. Po dopo o metìn l’elenc dai videos protagoniscj de retrospetive che il Pesaro Film Festival i à dedicât intal 2021. Il prin al è dal 2012: «Il tempo più importante», pai Amari. Po dopo vie pai agns a vegnin «Estate» (Meg), «Mambo Reazionario» (Brunori Sas), «Fall» (Populous), «Farsi Male» (Zibba e Nicolò Fabi), «Imperfezione» (Meg), «Un giorno come gli altri» (Sinfonico Honolulu), «Occhi d’oro» (Meg), «Like A Glass Angel» (Max Casacci & Daniele Mana), «Sdims» (Yombe), «Parentesi» (Meg), «Don’t Stop Me» (Bowland), «Mother» (Flamingo).
◆ Bon divertiment e bon viaç tal mont di Uolli! ❚

…………………………………………………………………….

LINK & LEAMS

I l link par savê di dutis lis sagris in Regjon al è dome un: www.sagrefvg.it. Il sît al à ancje une pagjine Facebook, https://www.facebook.com/sagrefvg.it. Par seguî ce che al cumbine Uolli, si pues viodi i siei social: su Instagram @uollinstagram, su Facebook cirît Tomas Uolli. ❚

Apontaments / AVÔT DAL FRIÛL

Redazion
Furlans,a son passe 50 agns che si cjatìn a Aquilee la dì de fieste dai sants Macôr e Fortunât palAVÔT DAL FRIÛLe o cjantìn Messe te nestre lenghe, tal spirt di chê libertât che si iludevin di podê respirâ almancul in glesie scomençant a doprâ il Messâl, che al è ancjemò intune spiete penose par […] lei di plui +

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +