Daûr di une liende, di un proverbi o di une conte popolâr si plate simpri une fonde di veretât
Al sarà forsit par cheste reson che cualchi mês indaûr, jessude la gnove di studis sientifics che a dimostravin la artificialitât dal çuc di Udin, nissun di noaltris si è maraveât plui di tant. Dal rest, no le vino imparade ducj di picinins, chê storiute dai soldâts di Atile che a fasin sù la culine cui lôr elmuts, di mût che il re dai Uns al puedi gjoldi di adalt intal viodi Aquilee che e bruse?
◆ Purpûr, chê che a prin trat e podarès someâ la scuvierte de aghe cjalde e je invezit une rivelazion no spietade, che e podarès fintremai scjassâ la vision de nestre storie.
Al va dit, di fat, che ancje se diviers studiôs a vevin ipotizât che il çuc nol fos naturâl, chest al è il prin studi sientific che al conferme che dute la aree (e no dome une part) e je stade creade dal om in timps antigons, ven a stâi vie pe Ete dal Bronç, tra il 1400 e il 1150 prin di Crist.
◆ Par dimostrâlu, al è stât puartât indevant un progjet di caratar gjeoarcheologjic, aplicant mieçs e struments tipics de gjeologjie a cuistions di caratar archeologjic, cemût che al marche il professôr Alessandro Fontana, docent di gjeomorfologjie dal Dipartiment di Gjeosience te Universitât di Padue (ma al è furlan) e coordenadôr des ricercjis.
◆ Dut al è nassût dal progjet pai assensôrs pal Cjistiel di Udin, cuant che, intal Dicembar dal 2020, un prin carotament di 40 metris al à mostrât che il cûr dal çuc nol jere fat di cret, ma dome di strâts di glerie e di arzile, un parsore di chel altri, intune secuence che no jere naturâl.
◆ In gracie de colaborazion cu la Sorintendence e cui Museus Civics di Udin, a son stâts puartâts indevant altris studis, cun datazions al carboni, analisis gjeofisichis, mineralogjichis e paleobotanichis, intune sinergjie tra gjeofisics, archeobotanics e gjeoarcheologjics che e à puartât a sfantâ cualsisei dubi su la nature artificiâl dal sît, fat sù in gracie dal materiâl di risulte sgjavât fûr dal Zardin Grant.
◆ No par nuie, al esist ancje un dissen di Giovanni Leonardo Carlevaris (1668) che al piture il Patriarcje biel che al monte parsore di une barcjute par navigâ il lât sot dal cjistiel. Il sfuei al ven ricuardât ancje inte liende dal drâc di Udin (che une sô cueste si le cjate te glesie de Madone des Graciis) e te documentazion storiche si cjate riferiment a chest lacus za tacant dal 1171.
◆ Al è probabil, dut câs, che cheste aree e sedi stade une zone umide ancje inte antichitât e propit la presince di aghe e varès puartât ae decision di fâ sù un cjastelîr, o miôr, un megamound, alt cuasi 30 metris e cuntun volum di passe 400.000 metris cubics, la plui grande opare di cheste fate in dute Europe. Chel di Udin, duncje, al podarès jessi stât un sît di riferiment par dut il rest dal teritori, furlan e no dome, un simbul religjôs cun valôr sacrâl, ma ancje un sisteme di control e di difese e dal sigûr une espression de potence des popolazions di chê ete. Une potence restade platade fin cumò sot di glerie e di arzile ma che il dêt dal agnul dal cjistiel nus invide a tignî ad a ments par cirî di lâ insot e scuvierzi i segrets platâts intal cûr de nestre tiere. ❚