SPECIÂL. Un cjanton… ladin

La aree ladine, che e je clamade ancje retoromance, e je stade dividude in trê areis difarentis e diviersis une di chê altre. Chestis si son disvilupadis ognidune par so cont par ce che al inten la lenghe: tal Cjanton dai Grisons (chê plui a soreli a mont) al è il Rumantsch, tes Dolomitis al è il Ladin e in Friûl o vin il Furlan.
UN CJANTON… DI SVUIZARE_ Il Cjanton dai Grisons, nassût tal 1803, al è il plui grant e chel plui a soreli jevât jenfri i 26 de Svuizare e al è ancje l’unic cjanton li che si fevelin trê lenghis (todesc, romanç e talian) e un dialet (lombart). E je une zone plene di monts che e confine cul Lichtenstein, la Austrie, la Italie, e dentri te Svuizare cul Cjanton Ticin e che e je une vore conservative, li che i Grisons a son in dì di vuê une minorance. Il cjâf lûc e je la citadine di Coira. La superficie e je sù par jù di 7105 chilometris cuadrâts (pôc mancul dal Friûl). Il cjanton al è dividût in 11 Distrets e in 211 Comuns. La popolazion e je di 188.762 abitants. Il non di Grisons che al vignive doprât par fevelâ des comunitâts sovranis dal Stât Libar des Trê Leghis, al vignì fûr tal periodi des Vueris de Italie e Francesco Guicciardini lu doprà cuant che al sielzè i soldâts des Trê Leghis che a cjaparin part ae concuiste dal Ducât di Milan insiemi cui Svuizars. Il doprâ chest non al è peât ae fuarce e ae impuartance de Lee Grise li che a jerin dentri oms impuartants tant che vescui, nobii e parfin l’imperadôr dal Sacri Imperi Roman. La invasion dai Francês tal 1798 e puartà ae fin dal Stât Libar des Trê Leghis e po dopo tal 1803 ae nassite dal Cjanton.
LIS TIPICITÂTS NO SON DOME LINGUISTICHIS_ La economie di cheste regjon si fonde su la agriculture, cu lis ativitâts peadis al bosc e al passonâ des pioris e des cjavris vie pe istât e sul turisim di mont pal plui tes citâts di Davos e di St. Moriz. Jenfri i prodots tipics, la specialitât e je soredut la cjar fate secjâ che si clame juste apont “cjar secje” e che e somee une vore ae bresaole. Tai dolçs, la torte di coculis e je la plui buine. Une vore preseadis a son ancje lis cjastinis de zone di Roveredo.
MONUMENTS_ Chest teritori de Ladinie al è siôr di monuments che a àn une architeture cuntun valôr ricognossût a nivel mondiâl: a Müstair al è un covent des benedetinis e une glesie romance che e je dentri tal patrimoni mondiâl dal UNESCO. Po dopo e je ancje la glesie di Zillis che e à un sofit cun 153 taulis di len cun parsore pituris dal 1130, li che a jentrin 200.000 personis ogni an par viodi chestis bielecis. Une particolaritât de architeture profane di cheste zone al è il “sgrafit”: disens, decorazions, scritis che a vegnin sgrifadis (di chi al ven fûr il non) su la stabilidure ancjemò mole dai mûrs, gjavant dal ultin strât lis parts li che po dopo a vignaran fûr lis figuris plui scuris.
Elena Zanussi