Un puint lunc 22 agns par fâ scuvierzi lis lidrîs ai furlans di inaltrò

Vincj students argjentins di divignince furlane dai 15 ai 17 agns a son tornâts te tiere dai paris par lâ a scuele: al è chest il risultât dal progjet “Studiâ in Friûl” che al è inmaneât dal Convitto Nazionale ‘Paolo Diacono’ di Cividât, la che i zovins a retin par dut un an di frecuence, cul jutori de Regjon, dal Comun, di Civibank, di Ente Friuli nel Mondo e de Fondazione Friuli.
◆ Fâ il viaç che i lôr vons a àn fat agnorums indaûr, ma al contrari, al puarte chescj fantats a scuvierzi lis lôr lidrîs e dispes a tornâ tai paîs alì che a stevin lis lôr fameis prin di lâ a cirî fortune inaltrò. Salacor a rivin ancje a metisi in contat cun lontans parincj e sut câs a puedin testâ culture, tradizions, lenghe e valôrs che a son vignûts indenant tal timp.
◆ Ae fin di cheste esperience i zovins a àn podût cognossi Giuseppe Morandini, President de Fondazione Friuli, e Loris Basso, President dal Ente Friuli nel Mondo: in cheste maniere a àn podût ringraciâ di persone chei che ur àn dade la possibilitât di vivi cheste oportunitât. personalmente coloro che l’hanno resa possibile. Cun Alberta Pettoello, Retore e Dirigjente Scolastiche dal Convitto Nazionale “Paolo Diacono”, e cul referent dal progjet Giorgio Cromaz, i students a àn spiegât di jessi stâts seguîts di docents-tutor e di Educatôrs che ju àn judâts a cognossi la storie de lôr int ancje cirint tai archivis. In cualchi câs i fantats a àn za cjatade cualchi prospetive di orientament e il lôr “Mandi” al Friûl al podarès deventâ dome un “A riviodisi”. Ce che al à colpît i arlêfs argjentins al è il tiessût plurilengâl de nestre tiere, che il “Paolo Diacono” al manten e al slargje sburtant i students a mantignî la lôr identitât ma a coltâ la cognossince di plui lenghis. Ai furlans di Americhe ur è stât ufiert un percors di certificazion de lenghe taliane e il patentin ECDL, par marcâ lis lôr competencis informatichis. In cheste maniere il percors formatîf dai vincj students al sarà ricognossût in Argjentine in gracie de normative su la mobilitât studentesche internazionâl.
◆ Intai agns chest progjet al à puartât a studiâ a Cividât cuasi siscent zovins di dut il mont butant jù un puint jenfri dai dissendents dai cunfradis furlans intal forest e la lôr tiere mari. Al è di sperâ, viodûts i risultâts, che e vegni simpri sigurade la continuitât dal progjet. Anzit, a saressin ideis di slargjâ e di puartâ indevant cun plui fuarce, stant che i furlans ator pal mont a podaressin judâ une regjon strache e cence masse ideis a rignuvî la sô energjie. ❚