Lenghis minorizadis, il PE e i esperts dal Consei de Europe a confermin la impuartance dai media

Il Parlament European al cjape posizion a pro di une revision de diretive de Union Europeane (UE) in cont di media e audiovisîfs e al fâs indenant une schirie di propuestis, là che al palese ancje une atenzion specifiche a pro des lenghis di minorance. Ai 9 di Mai stâts, juste in chê che e ven memoreade tant che la Zornade de Europe, i eurodeputâts a àn fat buine une Risoluzion che e domande di inzornâ i contignûts di chel at juridic di indreçament (Diretive 2010/13/UE) che al tocje i servizis media e audiovisîfs, che al rimonte a tredis agns indaûr e che al à vût une sô prime revision tal 2018 (Diretive 2018/1808/UE).
◆ La Risoluzion, che la sô relatore e je stade la socialdemocratiche todescje Petra Kammerevert (te foto), e fâs un riferiment esplicit ae Cjarte Europeane des Lenghis Regjonâls e Minoritariis intes sôs premetiduris e soredut e domande che si sburti la difusion di prodots che a rapresentin dut il panorame linguistic e culturâl de Europe e duncje ancje chei fats intes lenghis minorizadis. Il PE al marche ancje la dibisugne di meti dongje e di inzornâ i dâts in cont de disseminazion linguistiche dai servizis media e audiovisîfs juste par savê cemût che a van lis robis e par intervignî par fâle lâ in miôr. Tra lis indicazions fatis indenant cun chest intindiment a son chês di incressi i spazis là che a vegnin dopradis lis lenghis minorizadis no dome inte produzion audiovisive – cun plui prodots di cualitât plui alte e soredut cuntune distribuzion plui largje – ma ancje inte dopleadure, inte sottitulazion e intes descrizions audio. Su cheste cuistion a batin za di timp diviersis organizazions espression des comunitâts di lenghe minorizade, tacant de rêt ELEN (European Language Equality Network) e di entitâts tant che la galiziane A Mesa pola Normalización Lingüística, lis baschis Dizale Euskalgintzaren e Kontseilua e lis catalanis Òmnium Cultural e Plataforma per la Llengua.
◆ La impuartance dal ûs des lenghis di minorance tai media e je stade marcade ancje dal Comitât di esperts internazionâi che al è impegnât intal monitorament de metude in vore de Convenzion Cuadri pe Protezion des Minorancis dal Consei de Europe, che vie pal mês di Mai al à dât fûr la sô cuinte Opinion in cont de situazion dal Ream Unît. Cun di fat, cundut che la situazion in chest setôr e somee avonde buine massime pal galês, il Comitât al domande al guvier di Londre di fâ in maniere che inte gnove cjarte dai servizis de BBC a sedin previsions claris e operativis a pro de promozion e dal ûs des lenghis “altris” di Scozie, Gales, Irlande dal Nord e Cornualie.
◆ Tra lis osservazions fatis indenant a son chês che a tocjin la scuele, là che al è ancjemò une vore ce fâ massime pal insegnament e pal ûs dal cornic, dal gaelic scozês e dal gaelic irlandês, e lis competencis operativis des istituzions teritoriâls. In chest cjamp al ven marcât che il Consei de Cornualie al à di vê plui competencis, par jessi pardabon in stât di meti in vore une politiche linguistiche a pro dal cornic, e che par sigûr nol zove al disvilup des azions di tutele il lâ dilunc dal bloc dal funzionament dal guvier de Irlande dal Nord, che al è fer par vie che i conservadôrs unioniscj dal DUP no àn voie di poiâ chel che, daûr dal risultât des elezion politichis dal an passât, al varès di jessi il gnûf esecutîf vuidât di Michelle O’Neill dal Sinn Féin (SF).
◆ Ai 18 di Mai stâts propit inte Irlande dal Nord a son stadis lis gnovis elezions aministrativis e i republicans e indipendentiscj di çampe dal SF si son confermâts tant che il prin partît intes sîs conteis cul 30,9% dai vôts in gjenerâl e cu la concuiste direte di 144 comuns. ❚