ATUALITÂT. Ents locâi: une propueste

Si visaiso il “miracul” dal taramot? Stât, Regjon, Comuns e – parcè no? – la Glesie: dutun. Cuatri istituzions par une ricostruzion che e à fat scuele. Partìn di chi, di chest dât inconfutabil, par provâ a pensâ a une Cjargne anime di se stesse, de sô int, comprendude chê che e à metût lidrîs di là de “dighe” tumiecine.
SOSTIGNIBILITÂT_ In struc: formâ comuns sostignibii – no plui di cuatri, lant daûr magari ae orografie des vals – che a laressin al vôt normalmentri ogni cinc agns. Pe valade de Bût, par esempli, cjatade la sede plui juste  e conveniente – metìn Paluce – , al podarès jessi l’incorporament dai comuns atuâi di Liussûl, Trep di Cjargne, Paluce, Çurçuvint, Sudri e Ravasclêt, mantignint operatîfs i ex municipis pai servizis.
LA ASSEMBLEE_ Fate la operazion “Comuns de Valade”, dâ vite a une Assemblee cjargnele di “osservatori” permanent a votazion direte, cun rapresentants di ducj i centris abitâts. Il so compit autonom/decisionâl al sarès propit chel di osservâ, di controlâ, di proponi e di domandâ l’impegn  concret dai rapresentants politics regjonâi e nazionâi, in plui di furnî struturis tecnichis e aministrativis ai comuns, fasint cont suntune juste disponibilitât finanziarie.
Altris istituzions o  caroçons no coventin.
La prime richieste, e podarès jessi chê di dâ mandât ae Regjon di fâsi interprete cul Guvier par che al vegni determinât il stât di Zone Francje su dut il teritori cjargnel.
FISCO_ Un regjim fiscâl vantazôs al judarès a mantignî sul puest lis ativitâts economichis che za a esistin e al tirarès dongje altris insediaments produtîfs. No dome capanons, però: incentivâ la iniziative publiche e privade dal turisim, de zootecnie, cul recupar di terens pustots e bandonâts, e cun chei si varès la tutele dal paisaç e il rilanç des ativitâts agroforestâls.
Un volan par un disvilup compatibil, par une tiere disvantazade e di mont. Par fâ chest, tocje prin di dut domandâ il consens a la int, magari cuntun referendum, scancelâ cualsisei cjampanilisim cuintriprodusint e vê un unicum comun bon di puartâ “fen” in chel che al è il stali de Cjargne.
Par ultin, al è impuartant identificâ ben in sede di elezions personaçs che a puartin sì indevant i interès dai lôr partîts, ma soredut chei de Cjargne, e culì ancje i cjargnei sparniçâts par dute la Regjon a podaressin dâ une man.
DINO TEMIL