Consei regjonâl ae prove de autonomie

Butìn il voli sul gnûf Consei regjonâl. Provìn a scrusignâ lis novitâts intal cjamp de autonomie. Comencìn dal Pat pe Autonomie di Moretuzzo che al somee jessisi rinfuarcît cuntun 6,29% a nivel regjonâl, soredut cui vôts di Gurize (10,4%) e di Triest (6,1%). Ma sono vôts pe autonomie? O pe çampe bisiache e di Adesso Trieste? E po, la debile tignude a Udin e a Pordenon sono preferencis pal Pat o pe Civica de Liguori e di Putto? Cuistions interessantis che il leader di San Marc al varà di discrosâ in curt decidint in maniere clare se meti in pîts il cantîr pal partît autonomist o lassâsi atrai des sirenis de çampe che e sta cirint in mût disperât une leadership regjonâl.
◆ O sin invezit contents che ancje la diestre di Fratelli d’Italia e vedi mandât sù, prin e plui votât tal partît, Markus Maurmair, za sindic di Voleson Darzin e president in carghe de Assemblee de Comunitât Linguistiche Furlane. Tignaraial fede aes bataiis furlanistis pe lenghe furlane inte RAI e pe competence primarie ae regjon pe scuele? E, soredut, i Fradis di Italie di Manaçons jal permetarano? Lu tignarìn di voli…
◆ Insom il Los von Triest. Al è stât elet, e cun grancj numars, Mario Anzil, za sindic di Rivignan Teôr che lu ricuardìn pe bataie di cualchi an indaûr pes dôs provinciis autonomis dal Friûl e di Triest, cun tantis e impuartantis poiis come chês dal professôr Bertolissi e dal candidât al Nobel pe leterature pre Meni Zannier. Dulà sono finidis chês declarazions scjassosis? Tes risultivis de Stele a Aris? O sperìn che te atuazion des normis su lis provinciis che la maiorance di Fedriga e varà di meti in cantîr l’argoment al vegni cjapât in considerazion, dant rispuestis a une cuistion che e reste dut câs tal ordin dal dì de politiche regjonâl: cheste convivence sfuarçade jenfri Friûl e Triest che, se intant de vuere frede e veve une justificazion, vuê e varès di jessi almancul metude in discussion. Lu fasaraial il gnûf assessôr ae culture o pensaraial dome a la Fieste dai muarts di Rivignan? ❚