ATUALITÂT. A risi 40 agns di lavôr

Ancje la scuele furlane e fâs i conts cu la Riforme Gelmini par meti in vore ce che la leç e domande. Si à scomençât cun chê di taiâ la spese publiche e ancje la scuele e je stade tirade dentri te razionalizazion.
Cjalìn dome la cuestion dal tornâ al mestri unic polivalent te scuele primarie e viodìn un esempli in Regjon che al è emblematic. Cul 1990 tes scuelis primariis (ex elementârs), al è jentrât il team di insegnants tal puest dal mestri unic. Cussì i mestris a jerin trê ogni dôs classis (o pûr cuatri ogni trê), ognidun cuntun cjamp dissiplinâr; si previodeve ancje la figure dal tutor par personalizâ i procès di insegnament e di aprendiment. Cu la Riforme Gelmini (Leçs 133 e 169 dal 2008), za cu l’an scolastic 2009/10, al è previodût di tornâ al mestri unic par cui che lu domande. Su chest a son stâts dibatiments e protestis ma cumò si è rivâts denant de metude in vore. Cualis lis conseguencis par esempli dome in mert ae cuestion dal mestri unic? Il câs che o viodìn al è chel dal Istitût Comprensîf di Flaiban e soredut de scuele primarie a timp plen, ma indi son ancje altris in Regjon (Tierç, Aquilee, Flumisel e La Vile, Pantianins e v.i.).
La scuele di Flaiban, nassude il 1n di Otubar dal 1970 dal bas pe volontât de int, e je stade sperimentâl stant che la Leç Regjonâl sul timp plen e je vignude fûr tal ‘71. Ae ativitât didatiche tradizionâl si zontavin i laboratoris tal dopomisdì. La compresince di plui insegnants, vignude fûr tai ultins 20 agns, e à cjatât un teren pront in scuelis tant che cheste, li che za si lavorave metint adun plui insegnants e disvilupant ativitâts par une ufierte formative svariade, cu la pussibilitât di esprimi ancje lis abilitâts personâls. Chest servizi, in plui di dâ tant ai arlêfs in tiermins di formazion, al è stât tai agns cetant bon pes fameis li che i gjenitôrs, lavorant, a lassavin i fruts tun ambient positîf par plui oris. Un grant servizi pe comunitât locâl e par dut il teritori. Cumò la scuele si cjate tun moment critic stant che tal zîr di pôc la compresince e finissarà. Lis 40 oris setemanâls a vignaran garantidis ma si scugnarà pensâ a une riorganizazion, cence vê insegnants par fâ aprofondiments o recupars. Cussì al sarà un indebiliment inevitabil de propueste formative e il risi di pierdi un sisteme che tai agns al è stât un valôr zontât. Il numar dai fruts par ogni classe al è alton e un sôl mestri al varà ce fâ a lavorâ su nivei di aprendiment difarents, cun metodologjiis di insegnament che a cambiaran.
Savint che la scuele e je une des istituzions ae fonde de nestre societât, che e forme lis feminis e i oms dal doman, la pôre, ancje de Aministrazion Comunâl di Flaiban, e je che no si rivi a mantignî la ecelence che la scuele a timp plen e à dât tai agns; par chest il Consei Comunâl, te sentade ai  18 di Fevrâr, al à votât ae unanimitât un ordin dal dî par domandâ a lis istituzions regjonâls di pensâ a azions par superâ chest passaç, cuntun progjet condividût cu la Scuele e i Comuns. Si pense di tornâ ae sperimentazion che la nestre Regjon e je stade buine di meti in vore 40 agns indaûr, par vie de sô “specialitât”. In Consei Regjonâl tal 2009 e je stade depositade ancje une petizion, di conseîrs de Idv-Citt e dal PD e di rapresentants de scuele di Flumisel (circul didatic di Acuilee), parcè che i students dal Friûl Vignesie Julie a puedin vê ancjemò il timp plen.
Elena Zanussi