Giovanni Battista Cossetti e Giuseppe Pierobon: l’inovâl di doi amîs compositôrs

Tra i inovâi musicâi di chest an, teme che o ai gust di tratâ in cheste rubriche, a ‘nd è doi che al è biel meti insiemi. Si trate di doi musiciscj, mestris di capele, organiscj, compositôrs soredut di musiche sacre, che a àn lavorât dentri di chel moviment musicâl che si clame “cecilian”, dedicât ae Sante protetore de musiche e dai musiciscj Sante Cecilie. Chel moviment, che si è palesât tra la fin dal Vot e dilunc de prime part dal Nûfcent, e che al à viodût Giovanni Battista Candotti e Jacopo Bartolomeo Tomadini tra i prins promotôrs a nivel talian, al intindeve ripristinâ une cierte creance dentri de musiche di stamp liturgjic, slontanantle de ande profane e teatrâl che e jere daûr a cjapâ simpri di plui, almancul tacant dai disvilups de musiche galante dal Sietcent. In sumis, a puartavin indenant la cause che la musiche di glesie e à di sunâ di glesie, no di ostarie, vint a model la musiche gregoriane, cu lis peraulis comprensibilis, cuntune polifonie parche e nissune confusion, acetant tant che strument, di là de vôs, dome l’orghin, ancje chel rivisitât, o ben riformât daûr di sieltis di sunôrs spirituâi.
◆ Tra i animadôrs plui atîfs di chest moviment in Friûl, a son di nomenâ dal sigûr Giovanni Battista Cossetti (1863 – 1955), che a colin i 160 agns de sô nassite, e Giuseppe Pierobon (1893 – 1986), che a ’nd è invezit 130. Il prin nassût a Tumieç, e il secont a Massanzago, Padue, ma stabilizât a Çopule tacant dal 1911 e li restat par dute la vite. Il cjargnel invezit si è trasferît tal 1905 a Cjons, e duncje ancje lui tal pordenonês, tant che ducj i doi a son stâts cetant atîfs dentri de Diocesi di Concuardie Pordenon, ancje se il prin al à militât par un biel toc in chê di Udin.
◆ I doi si cognossevin benon e a vevin stime un par chel altri. Dispès si son cjatâts a eseguî lis lôr composizions in cerimoniis e fiestis di ordin vari, a screâ orghins e glesiis ator pal Friûl, e ducj i doi a àn publicât diviers lavôrs pe cjase editore Zanibon di Padue e pes rivistis cecilianis dal timp. A jerin amîs dal cont Francesco Panciera di Çopule, un vêr mecenat, e a àn tirât sù diviersis “scholae cantorum”, ven a stâi scuelis di cjant dentri des parochiis, scrivint tante musiche, soredut sacre, ma ancje cjants ricreatîfs, composizions par orghin e armonium e cjants di ocasion.
◆ O invidi i letôrs a discuvierzi chestis figuris midiant de leture di publicazions sul lôr cont: jo o ai vût il plasê di dedicâ la mê tesi di dotorât di ricercje realizant la biografie plui esaustive sul so cont, cuntun libri di 450 pagjinis editât de Forum, e cul titul “Giovanni Battista Cossetti e la riforma della musica sacra in Friuli tra Ottocento e Novecento”. Su Pierobon o segnali invezit il volum dai ats di une cunvigne, par cure di Luca Canzian, “Giuseppe Pierobon, una vita per la musica”, editât de Usci. O conti culì juste cualchi curiositât sui doi musiciscj, une par om.
◆ Cossetti a un ciert pont de sô vite al à otignût, graciis a un anonim “santul di Americhe”, une grande ereditât, e duncje al à finît di lavorâ di perît agrimensôr, di insegnant intes scuelis e di dipendent comunâl, e si è dedicât dal dut ae musiche, trasferintsi in chê biele vile che e je a Cjons, inte vie che cumò e à il so non, lassant lavorâ i tancj terens che al veve vût al so grant amì Ermanno.
◆ Pierobon invezit al jere vuarp di cuant che al veve cuatri agns, e si jere formât dal pont di viste musicâl inte scuele di Luigi Bottazzo, tal Istitût Configliachi di Padue. Clamât a Çopule daspò dal diplome in orghin come organist titulâr e mestri de corâl Sante Cecilie, al restarà li par dute la vite, tra l’altri sposant la sûr dal cardinâl Celso Costantini, Cecilia Serafina. Premiâts ducj i doi cun altis onorificencis talianis e vincidôrs di diviers concors di composizion, a àn lavorât cun tante passion in dut il Friûl, otignint une cierte nomee ancje fûr de Patrie, furlane e taliane. ❚