✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.
✽✽ Si cjatìn di fat devant di une contradizion palese se o cjalìn lis tapis che insegnants e arlêfs a son daûr a fâ. O vin une presince aromai consolidade inte infanzie e inte primarie, cun docents e materiâi a disposizion; alc si môf, masse pôc, inte secondarie, ma dut al è fer tes superiôrs, e no stin a fevelâ de Universitât.
✽✽ In chest mût o din la impression, aes fameis in primis e ae societât civîl di consecuence, che l’ûs dal furlan, il so aprendiment al sedi une materie juste dome fin a un ciert nivel de istruzion e che, passâts ai studis plui alts, al pierdi di impuartance.
✽✽ Une lenghe çoncjade duncje, che e piert imagjin e impuartance plui che si va indevant intai studis.
✽✽ Nus vise masse chê idee teribile che fevelâ par furlan al ledi ben dome in cjase e te ostarie. Une teorie sostignude ancjemò vuê di masse int.
Alore o vin decidût che, se no i pensin altris, e vali la pene di fâ valê chel “di bessôi” che al comparìs sul nestri mensîl.
✽✽ E o sin partîts di un apontament impuartant tant che l’esam di maturitât par furnî ai students che a frontaran cheste prove un strument di cognossince storiche e linguistiche diviers dai solits manuâi.
✽✽ Chei che di fat a volaran cjatâ un contignût inovatîf, une ispirazion divierse pes lôr tesinis e, tal stes timp, inricjî in marilenghe il lôr curriculum scolastic, sul sît de Patrie a podaran cjatâ e discjamâ a gratis une serie di dispensis dal titul “Il Friûl viodût dai scritôrs”.
✽✽ E je une serie cetant biele e inovative di articui scrits di Agnul Floramo, che a permetin di cognossi il pinsîr e la disposizion che i plui grancj scritôrs talians, e no dome, a àn vût pe nestre tiere.
✽✽ No si podeve no scomençâ di Dante, forsit il plui critic che o cognossìn su la lenghe e sul popul furlan, par passâ dopo a Sacchetti, Boccaccio, Ariosto, Goldoni, ma cuntune cjalade che e tocje ancje i contemporanis tant che Ivo Andric e Hemingway.
✽✽ Insume, e je bondance di materiâl par cui che al vûl presentâsi ae comission di esam cun alc di alternatîf, ma cun lidrîs storichis e leterariis saldis.
Ancje par fâ biele figure. ❚
