IL FERÂL. Scuele: invasion di… furlans

La Patrie dal Friûl di Setembar dal 1983, n. 9
L’an che al ven, stant al Proveditôr, ducj i pressits des scuelis mezanis a varessin di jessi titolârs. Tant a dî che, dopo, no ’nt jentrarà nissun.
Viodin alore cemût che si sta inmaneant la robe, ancje par fâsi une idee su trope sperance che si pó vê suntune scuele furlane. E si sa che, mancjant la scuele, un popul al à sorte di insumiâsi un avignî decent.
Sicheduncje al Marinoni (gjeometris) al é lât l’ing. Cudia; al sientific di Cervignan la prof. Maria Rosaria Codelli, femine dal pressit des magjistrâls di San Pieri dal Sclavons, il prof. Enrico Guglielmi. A Latisane si é sentât il prof. Norberto Cacciaglia, di Rome; a Tarvis il prof. Giuseppe Mein, di Rome; al Paschini di Tumieç il prof. Giorgio Romani, di Rome; al agrari di Cividât il prof. Vittorio Coppola, di Avelin; a Codroip il prof. Giovanni Licordari, di Rome; al tecnic di San Denêl la prof. Italia Catapano, di Rome; al comerciâl di Palme il prof. Giuseppe Putrino, di Regjo Calabrie; al professionâl pai turiscj di Lignan il prof. Angelo Carrubba, di Sulmone; a Puçui il prof. Giuseppe Gennaro, che nol é siguramentri di Mortean.
Se tes superiôrs al é tristimp, nol é che al lusi il soreli tes inferiôrs. E di fat, dai tancj, a Buri al è lât Pietro Posenato; a Cjasteons al reste Del Bene; a Rubignà la prof. Lamberti Mattioli; a Comeglians il prof. Bonetti, veronês; a Flumisel al é rivât il prof. Vangi, di Foggia; a Forgjarie il prof. Venneri, di Lecce; a Mueç il prof. Guglielmino, nancje lui furlan. A Palme al é Russo; a Palaçûl Amodio; a Pontebe Colucci, padoan. A Rude Giuseppe Munna al cjape la place di so fradi Giovanni, cu la cuâl che a San Zuan al Natison al è distinât il prof. Pizzamiello, furlanissim ancje tal non. A Talmassons al é De Maria, ancje lui dal Regno delle Due Sicilie.
Chest dome il penç e dome a nivel di pressits. Se podopo si zontin i professôrs, i diretôrs didatics, i mestris, i suplents e dute la tribú di vie Liruti, il telâr al é complet.
A chest pont no pae la pene di scrivi sú pai mûrs «Furlans, sveaitsi». Se al é vanzât un boç di colôr baste meti: «Continuait a durmî». E a tignî sú il balon.
Civiltât o barbarie?
La scuele e je il spieli di une civiltât. Come a dî che un popul plui civîl al é e plui al palese, tal mût di imbastî la scuele, i valôrs di civiltât che al siere dentrivie.
Chest pinsîr mi à vignût in cjâf, lant sú a Tschlin, a cjatâ Hans e Lillj Gademann (pastôr e pastore de Glesie Evangjeliche, vignûts di Zuric e di Berne a svolgi il lôr compit in chest paisut de Basse Engjadine in Svuizare, a 1500 metros di mont.)
A son ducj i doi laureâts, e di marilenghe todescje, ma par vignî a fâ di plevan in chel paîs a àn studiât il rumanç (come a dî il furlan de Svuizare) e a tirin sú lis lôr dôs frutis in chê lenghe; Lillj e je presside de scuele elementâr dal puest.
II paîs al é piçul (un 250 animis), ma la scuele elementâr e à 100 fruts, par vie che invezit di dispueâ i paîs di mont de latarie, dai esercizis e des scuelis, come che a fasin ca di nô, par puartâ jú dut tal mâr grant, là vie i siervizis a son spartîts un tic par lûc, in mût che ancje il paîs plui alt al pues viodisi – par esempli – vignî sú i siorets dal capolûc, a imparâ che no son lôr il centri dal mont, e a spiâ une muse gnove di civiltât.
O jentrìn. A son aulis grandis, cui bancs in rie, la lavagne, i scafâi dai libris, che a clamin l’idee de serietât (Su lis parêts, cualchi tabelon nus vise che i fruts a àn ancje dôs lezions di todesc par setemane, stant che dut il rest si lu fâs par rumanç!). Ma dongje des aulis scolastichis, trê laboratoris ben tressâts nus palesin a sec che o sin tun altri mont. Tal laboratori di cusine i fruts a imparin a pistrissâ sú ce che a àn di meti sot des gramulis. In chel di sartôr a picjin botons e a imparin a dâ i gasios. E ta chel di marangon o viodìn i lôr intais tal len: che a fasin za pensâ a lis bielis casselis dai tinei!
Dut chest lu fasin fruts e frutis: par vie che nol é just che un al stedi nome a cusî o daûr dai cits, e chel altri nome a sbregâ e a mangjâ; e se la frute e à une vene artistiche, al é di just che le palesi. E a son fruts des elementârs, come a dî che lis primis necessitâts che mari nature nus à metût parmìs, si à di imparâ a curâlis fin di cuant che si impare a menâ la lenghe.
Stant che o vignìn di un altri mont, o restìn, a viodi une tâl; ancje se no coventaressin peraulis par comentâ cheste scuele. Lis peraulis, di fat, i coventin a di cui che al vûl spiegâ ce che no si pues spiegâ…
E alore o pensi a lis peraulis di chei che a vuelin spiegânus parcè che ca di nô ducj i fruts des frazions – di solit i paîs plui virgjins, plui vivarôs e nets! – a vegnin depuartâts sul nassi, dai lôr paîs, a fâ omagjo ai grancj palaçons di ciment e lis “autoritâts” dal “centri”; par sierâju ta chês bielis aulis, a studiâ, come pipinuts in vitrine, cence poçolâsi o fâ di sfuarç…
O jessìn de scuele e, passant pal curtîl, nus cole une calumade di là de filiade; là a nassin vuainis, cartufulis e lidric, che i fruts a àn semenât. Cartufulis e lidric, che ancje lôr mi fasin pensâ a la civiltât; che la scuele e je propit il segno de civiltât di un popul.
E fasint un paragon cu la nestre scuele, o scuen domandâmi ce robe mai che e je cheste civiltât. Ce che a pensin chei che si jemplin la bocje cun cheste peraule che ognidun al vûl doprâle e le dopre in propri, cemût che i poche, cuntune svintule di significâts diferents che no son nancje cusins.
Fin a dâi un sens che a usance mê, i semee plui a di chel di “barbarie” che no a di chel di civiltât!
Fint a rivâ parfín a un tipo di scuele che in onôr de civiltât (!?), cun disinvulture e cence nancje vergognâsi, no ur cjacare nancje ai fruts te lenghe di sô mari! E che lis maris a acetin chel tant cence nancje scomponisi!!
“Civiltât” alore: ce ise cheste robe?
O confessi che no ai propit la sigurece dal vocabolari tal dâ un parê in merit.
Plui just mi samearès dî che: “civiltât”, ognidun al à chê che si merte!
pre Antoni Beline