Doi libris di no pierdi, dôs ocasions di culture alte che i amîs de “Patrie” a àn vût maniere di preseâ. Intal ultin mês la Clape culturâl che e edite il nestri gjornâl e à presentât doi volums che a son fats par restâ, e che a insiorin la nestre golaine “La machine dal timp”. Il prin al è “Patriarcjis tal cûr de Europe”, di Diego Navarria, che al complete la galarie une vore stuzighine des contis sui vescui di Acuilee, za screade l’an passât cun “Patriarcjis fûr dal ordenari”. Il libri al è stât presentât ai 13 di Otubar te Librarie Tarantola di Udin, dulà che – adun cuntune vore di “furlans che no si rindin” – a batiâ il progjet al è intervignût in rapresentance de Regjon ancje il president dal consei Pier Mauro Zanin, che al à sostignude la iniziative.
◆ Ai 2 di Novembar po, intun Salon di Palaç Belgrât pardabon plen di int, e à viodût la lûs “Anime in crôs”, une biele racuelte dai scrits su Pasolini di pre Toni Beline e Agnul Floramo: i prins a son tirâts fûr de “Trilogjie tormentade” (publicade intai agns Novante dal secul passât), i seconts invezit ju cognossin ben i letôrs de “Patrie” parcè che a son chei de rubriche “Pasolini – Cjant e discjant” che e à sierât ducj i numars di chest an dal nestri gjornâl. La presentazion e je stade insiorade dal dialic tra Floramo e Mario Turello, critic che al à analizât in profonditât la completece des analisis dai doi autôrs e lis someancis inte lôr prospetive. A puartâ il salût de Regjon e je stade la assessore ae culture Tiziana Gibelli. ❚
