A Dimpeç un imbinament interessant tra tradizion cjargnele e antighis crodincis preromanis
Ancje chest an, ai 31 di Otubar il centri dal Comun di Dimpeç al è stât animât de celebrazion de inmagante rievocazion storiche de “Not Dalis Muars”, version cjargnele dal prin dal an Celtic.
◆ La “Not Dalis Muars”, pûr vint origjins avonde resintis (e à cjapât forme in graciis di une idee de dimpecine Morena Fachin inte seconde metât dai agns Novante), e rapresente un imbinament interessant tra tradizion cjargnele e cualchi crodince antighe dai popui celtics, che in epoche preromane a vivevin in chestis tieris.
◆ E al è propit il Samhain (o “prin dal an Celtic”), celebrât il prin di Novembar, a furnî buine part de ispirazion pe fieste de “Not Dalis Muars” di vuê: il Samhain al consisteve inte crodince che, tra lis ultimis zornadis di Otubar e lis primis di Novembar, lis animis dai muarts a rivassin tal mont dai vîfs. Cheste fieste e segnave in maniere uficiâl il tacâ de stagjon plui scure, frede e nereose dal an. Nol è dificil, duncje, imagjinâ parcè che il popul antîc al ves individuât propit chest tant che il periodi li che al podeve verificâsi l’acjadiment macabri dal tornâ dai muarts.
◆ Simpri a ispirazion de “Not Dalis Muars” o cjatìn la tradizion dal intai des cocis. Une volte in Friûl e jere difondude la abitudin di intaiâ lis cocis, meti dentri un lumin e lassâlis fûr de jentrade di cjase vie pe gnot dai muarts: si crodeve di fat che, fasint cussì, i spirts triscj che a vagolavin si saressin spaurîts e a saressin restâts lontans des abitazions. Su la fonde di chestis vecjis crodincis, si è disvilupade dopo la fieste americane moderne di Halloween, che il so tai consumistic al à divorât però dut l’aspiet rituâl.
◆ In ocasion de “Not Dalis Muars”, la tradizion dal intai des cocis e je stade ricuardade cuntune piçule mostre intal ufici turistic di Dimpeç, dulà che si son podudis amirâ lis cocis intaiadis, pe plui part, dai fruts.
◆ A fâ une vore sugjestive la atmosfere de fieste al à contribuît come simpri il vê distudât lis lûs dal paîs, che dilunc dal event al è iluminât dome di torcis, ferâi e piçui fûcs. Il centri di Dimpeç al è stât ben animât di cualchi barachin gastronomic e di artesanât locâl, dai spetacui sorprendents di un falconîr, di spetacui teatrâi vivarôs e dal sun di musichis medievâls e rinassimentâls.
◆ “E je stade une grande sodisfazion podê celebrâ di gnûf, dopo ben cuatri agns che al jere fer par vie dal Covid, chel che pal nestri Comun al è l’event principâl dal an”, al dîs Stefano Zatti, president de Pro Loco di Dimpeç. “La “Not Dalis Muars” e rapresente un moment impuartant di rievocazion e condivision di chês che a son lis nestris lidrîs e tradizions. Par chest a van ringraciâts pal lôr impegn e pe colaborazion il Comun di Dimpeç, in particolâr il sindic Michele Benedetti, i membris de Pro Loco locâl e ducj chei che a àn partecipât aes fiestis.” ❚
