“Nova Gorica e Gurize capitâls europeanis de Culture 2025 a son une oportunitât iripetibile che no ’nt sarà une compagne tai prossims 30 agns. E je ancjemò plui grande di chê di une Expo, stant che e dure un an e non dome sîs mês, e e rapresente un volan ancje par altris iniziativis di nivel di fâ insiemi, come la candidature unificade dal Cuei/Brda a patrimoni Unesco”.
Su chest si son cjatâts dacuardi la assessore regjonâl ae culture Tiziana Gibelli e il gnûf consul gjenerâl de Republiche di Slovenie Gregor Šuc, che si è presentât ae aministrazion lant in visite al Palaç de Regjon a Triest.
◆ Gibelli e Šuc a àn marcade la necessitât di intensificâ la colaborazion stant che GO!2025 al sarà un apontament di speciâl interès european. E je la prime volte che la capitâl si cjate sore doi confins, ancje parcè che Gurize e reste uniche tal sô jessi dividude in doi des frontieris de storie. Al è za cualchidun che al fevele de “Jerusalem de Europe” o de “seconde Berlin”. A part i sprocs, ai guviers e ai aministradôrs des dôs citâts ur interesse cemût passâ parsore dai ostacui tecnics che un percors tant ambiziôs al puarte cun se.
◆ A judizi dal assessôr regjonâl e dal consul, a àn sotlineât che e va valorizade la situazion di gjenerâl consens dal bas, popolâr, che cheste candidature e gjolt. “Lis lidrîs de convivence ative in pâs inte comunitât di Gurize a van indaûr vie pai secui” e à dit la Gibelli. Par chest la volontât dai citadins sedi talians che slovens e je chê di recuperâ la sintonie pierdude tal secul passât e di rinfuarçâ lis ocasions di incuintri e di cooperazion. La Regjon Friûl-Vignesie Julie, su chest, e à previodude la inclusion dal teme di Gurize, almancul par un dai events in cartelon, in ogni program proponût dai sogjets che a cjapin finanziaments regjonâi. Pe Gibelli, “si pues cjalâ cun fiducie ai prossims mês, ma al coventarà un sfuarç intensificât di bande di ducj. Al vâl la pene, parcè che – secont la assessore – Go!2025 e pues vê risultâts di atrazion straordenaris ancje a nivel turistic, come che al è stât cun Matera intal 2019”. L’inseriment dal non des citâts intai itineraris par chescj events, dopo dispès al devente definitîf se si è bogns di creâ ricetivitât, struturis e cualitât des propuestis. ❚
GO!2025, cuant che la condivision e je une oportunitât
Redazion