“Maravee e je une peraule maraveose. E je di divignince latine, saltade fûr dal verp mirari, cjalâ cuntun sens di straneament, di sorprese, par solit positîf, dismovût di alc di straordenari o no spietât. Il sostantîf singolâr al devente mirabilis, il plurâl mirabilia, ven a stâi robis di no crodi, fûr dal ordenari, portentosis, che prime dal rivâ de maravee a jerin discognossudis”
◆ Cuâi sono i ingredients par meti adun un libri di cheste fate? Un libri che al à vinçût il premi S. Simon intal 2021?
◆ Al covente prime di dut un grant lavôr di documentazion. A vuelin cognossûts ben i archivis storics dulà cirî lis informazions su Giuseppe Govetosa, un agrimensôr furlan (nassût intal 1892) cu la passion pes motos, su Luigi Del Bianco scarpelin furlan (ancje lui nassût intal 1892) che al à vût lavorât in Americhe, su Licio (Denis) Moroso (nassût intal 1920) prestigjatôr furlan, su l’Ataman Krasnov, che furlan nol jere ma che in Friûl al è vignût cun altris cuarante mil cosacs (e culì mi permet di robâ cualchi rie par motivâ che il nomenât gjornalist talian Indro Montanelli, cu la sô solite arogance, al à vude dineade la veretât di cheste pagjine di storie). E su acjadiments plui dongje di nô sicu lis aluvions di Tisane (1965 e ’66) e lis esercitazions militârs su la mont Bivare dal 1979.
◆ E po i vûl zontade une buine competence in zoologjie: il cjan des lusignis, la acuile nule, la modonarie, la pavee dal veri, il gjat di lune e la magne di mont: di ognidun o vignìn a savê la morfologjie, la difusion, l’habitat, il compuartament, la alimentazion, lis relazions antropichis, i mîts e lis liendis che ju rivuardin. Dut compagnât di fotografiis e di dissens che nus judin a capî di ce che si fevele.
◆ E daspò, naturalmentri, e covente une buine dose di fantasie. Che a Serafin no i à mai mancjade.
Vonde cussì? Eh no! L’ingredient plui impuartant al è un altri, al è il savê scrivi.
◆ E cussì, velis servidis chestis sîs contis vivarosis e plenis di morbin. E par ognidune un pâr di pagjinis par spiegâ ce che al è di vêr intes storiis contadis. ‘Il rest al podarès ancje no jessi vêr’. Ma covential propit savê cetant che al è inventât? No isal miôr bandonâsi ae maravee? ❚
