ATUALITÂT. Siums di glace

Cuant che si è fruts, massime daspò vê let cualchi libri di Jules Verne, al è une vore facil insumiâsi di jessi un esploradôr ae discuvierte di puescj fantastics li che dome la fantasie e pues rivâ. Cul cressi, i siums si smamissin e, par vie di sieltis o par une plee che e cjape la vite, lis distancis li che si lave di piçui cu la fantasie, si scurtin. Cheste regule mai scrite e vâl pe gran part de int, ma no par Michele Pontrandolfo, esploradôr pordenonês a timp plen, cul balin pes aventuris estremis e pe  “etiche esplorative”, val a dî cence il supuart di compagnie, di cjans o di velis di trazion.
Michele al è un moderni “Amundsen” che al fronte lis sôs aventuris dome cuntun pulken in vitroresine (une slite norvegjese li che al met vivars e imprescj), un pâr di schîs e une determinazion che e va cuintri il so caratar timit e pacheôs (furlan).
LA ULTIME SFIDE_ Te sô ultime spedizion, al è rivât al Pôl Nord Magnetic (prin furlan e prin talian) e al à plantât la bandiere de Patrie, daspò vê passât 31 dîs e 600 km in solitarie, partint de Resolute Bay in Canadà, e cjaminant sul glaç jenfri mil dificoltâts; une slite di 110 chilos di tirâsi daûr, temperaduris di 35-50 grâts sot zero, un ors in cercje di mangjâ e soredut il teren (il pack) di tignî di voli par vie des modificazions continuis. Une aventure documentade di Toni Capuozzo tal so Program “Terra” e supuartade, pe part logjistiche e economiche, di ents locâi e di un grup di aziendis de ecelence furlane.
Pontrandolfo al tache a frecuentâ lis monts fin di zovin in gracie des colonis estivis in Cjargne, e daspò vê studiât di grafic, si è arolât volontari tai alpins (te sôs spedizions al à simpri daûr il cjapiel di naie). Daspò vê fât ancje il brevet di parecjadutist al devente speleolic, scomençant une ativitât intense tes grotis dal Friûl.
Intal stes tim, al bacighe l’ambient dal alpinisim scjalant, fasint schi alpinisim, rimpinant in crode e su salts di aghe glaçade.
IL CICLI DE GLACE_ Intal 1998, scjalant di bessôl la part nord de Marmolade, al scomence un cicli di aventuris (sul Mont Blanc e sui Tauris) che a àn come denominatôr comun la glace e la concuiste in solitarie. Daspò doi agns, al puarte insom la sô prime spedizion in Groenlandie e di li indevant, fin in dì di vuê, lis spedizions a saran 8: Groenlandie, Islande (Vatnajökull versant Snafell – Nydalur), Pôl Nord Gjeomagnetic (partint de Groenlandie), Islande in solitarie (Vatnajökull versant Jokulheimar – Snafell), Pôl Nord Gjeomagnetic (partint dal Canadà), Svalbard, Pôl Nord Gjeografic (simpri di bessôl), Islande in solitarie (Vatnajökull versant Jokulheimar – Jokulsarlon), Hielo Continental Sur (tentatîf de bande dal versant Jorge Mount – Puerto Natales) e Pôl Nord Magnetic in solitarie (Resolute Bay – Pôl Magnetic).
Il Rapuart di Pontrandolfo cu la glace al è une vore particolâr. In fonts, e je une sfide al limit des pussibilitâts umanis, ma tal stes timp al è un rapuart di grant rispiet, tant che lui stes al dîs: mi da gjoldiment pensâ di tornâ tal Ocean Artic li che la nature e decît se fâmi passâ o se fermâmi par simpri.
Prossime aventure, il Pôl Nord Gjeografic.
Sandri Olivetto