Aziende Agricule Rovis Sabrina di Davài di Lauc

“Fin al 2001 o jeri a vore intune fabriche” e conte Sabrina Rovis di Davai di Lauc. “Dopo de prime maternitât no vevi nissun che mi podès tignî la frute. Mê mari si è ocupade di agriculture par 40 agns e mi à dit se o volevi dâi une man. Cussì, a 30 agns o ai scomençât cu la produzion di prodots frescs (cartufulis, fasûi, capûs…). Tal timp, viodint che in ciertis zornadis intai marcjâts e restave robe, viodût che e jere la pussibilitât di fâ un piçul laboratori pe valorizazion e conservazion dai prodots, o ai rivât adore a creâ il gno laboratori di dôs stanziis indulà che o lavori i miei prodots. Sul principi o ai tacât cun pocjis butiliis di sirop di savût e cuntun pôcs di vâs di coçuts sot vueli, cu la idee di recuperâ dute la materie prime par no straçâ nuie. Mê mari e à simpri vût la manie di coltivâ pomulutis, o ben chei che ur disin “piccoli frutti”, e cussì o vin tacât a fâ sirops e marmeladis, fin a rivâ tal 2022 che mi cjati un pôc cjapade mâl pal masse lavôr. O ai scugnût dî a gno fradi di cjapâ sù la aziende dai prodots frescs parcè che jo no rivi plui a stâi daûr. La mê stagjon lavorative e scomence tal mês di Març cjapant sù la tale e metintle vie tai vâs sot vueli; dopo o voi a cjapâ sù l’ai, o fâs il pestât e lu met sot vueli; dopo al ven il moment di cjapâ sù urtiis par fâ il pestât; po dopo al è il periodi indulà che o ai di viodi dai prodots dai cjamps: coçuts, cartufulis…, e capûs in Atom. Cuant che o voi a seâ i prâts, mi capite spes di cjapâ sù pêrs e meluçs, e cussì o fâs diviersis cualitâts di marmeladis. Insome, mi ricjati cuntune produzion che e scomence tal mês di Març e che e finis cui crauts in Dicembar. Cussì o rivi a vendi dut il timp dal an… e a jessi impegnade 7 dîs su 7. Tant al è che o ai podût comprâ un puest di parcament a Tumieç par lâ ogni lunis sul marcjât, e o ziri ducj i marcjâts che a son ator pai paisuts de Cjargne.”
◆ Par savê di plui sui prodots di Sabrina e par viodi indulà che si puedin cjatâ, al baste dâ une cjalade tal sît https://agricolarovis.it/
◆ I siei prodots a son un grum ricercjâts ancje “parcè che – e va indenant Sabrina – o vivìn intun ambient no incuinât, o vin la aghe nete e l’aiar pûr, e la materie prime e je buine. Par esempli, par cjapâ sù lis urtiis o voi in puescj fûr dal paîs e fûr de puartade des machinis. Ancje i prodots frescs dai nestris cjamps a son bogns parcè che tes nestris produzions no butin nissune sorte di velen. O cirìn di sielzi plantis e semencis fuartis. La uniche robe che o doprìn a son lis centis ator ator dai cjamps par evitâ di lavorâ dibant e di dâur di mangjâ ai animâi dal bosc. Chest lavôr lu fâs cun passion e come che al dîs un sproc “se tu fâs un lavôr che ti plâs, no tu lavoris nancje une ore in dì”.
◆ “Ciert, vivi e produsi a Davai nus permet di vê un ambient san ma di fat no trop a puartade di man de int: par chest, o voi ator pai marcjâts par vendi i miei prodots e cuvierzi cussì buine part de Cjargne. Ancje lâ tai marcjâts no simpri al è facil, massime se al plûf, se al nevee e se al è frêt. O ai fate une sielte dificile ma che tal timp mi à ripaiade cun tantis sodisfazions…”
◆ Come simpri, al vûl sudôr e sacrifici par fâ alc in mont. Ma la passion e jude, e e je stade passade ancje ae fie di Sabrina che e je daûr a studiâ agrarie, e cuissà che une dì no puedi dâi une man a tignî vive cheste aziende di Davai. ❚