Cjampfuarmit capitâl de memorie

Un grum di voltis “La Patrie” e à batût par che la memorie de Prime vuere mondiâl, che e à scjassât il Friûl, e fos sclaride inte sô dramatiche complessitât, scliçade de retoriche nazionaliste taliane. E a Novembar o vevin pandût dut il marum par cemût che ancje inte celebrazion resinte dal “Milite Ignoto” davuelte a Aquilee nol sedi stât rispiet pe tragjedie di un popul che nol veve volût chel conflit, ma lu veve soredut patît.
◆ La prime rispueste, biele e significative, di une istituzion furlane e ven dal Comun di Cjampfuarmit che inte sentade dai 14 di Dicembar al à decidût di onorâ cu la citadinance onorarie i cuatri Fusilâts di Çurçuvint, vitimis che a rapresentin ducj chei che a son stâts copâts cence colpe “dal fûc amì”, tal non di une justizie che in chest e in cetancj altris câs e jere dut fûr che juste. Il destin di Silvio Ortis, Giovanni Battista Coradazzi, Basilio Matiz e Angelo Massaro al è emblematic de assurditât di une vuere cence sens ni umanitât, dulà che di bande taliane a forin miârs i procès par diserzion, insubordenazion e amutinament. Par no lâ indevant su chel troi, al coventarès visâsi de lôr storie: ma il Stât talian no ju à mai formalmentri riabilitâts. Il nevôt di Ortis al veve provât a domandâ un at uficiâl par comedâ chest tuart, ma la rispueste e jere stade che la domande no podeve jessi acetade parcè che “e mancjave la firme dal interessât”, justiziât tal 1916.
◆ Pal consei di Cjampfuarmit chescj cuatri oms no dome no àn nissune colpe, ma anzit a meretin di jessi ricognossûts tant che confradis e concitadins. E il stes onôr al va a altris doi furlans: il consei al à votât la citadinance ancje par Riccardo Giusto e Eugenio Sandrigo, che a son stâts i prins doi muarts a colâ sul front talian, il prin sul Kolovrat, il secont a Porto Buso. Un cu la monture taliane, chel altri cun chê imperiâl: ma ducj i doi furlans. Ai 24 di Mai dal 1915 i doi zovins de stesse divignince, separâts de Storie, a forin unîts di gnûf de muart.
◆ A Cjampfuarmit i conseîrs a àn savût lei la storie fin insom, e no fermâsi ai titui di manuâi che a strissinin une leture che e je ancjemò chê de ete fassiste, tignude vive par desenis di agns soredut in clâf antislave. La propueste nassude dal conseîr Oscar Olivo e à vût il bon acet dal sindic Erika Furlani e dal so vice Christian Romanini, e e je stade fate buine ae unanimitât dai conseîrs (12 sui 17) presints ae sentade. Ae lôr sensibilitât ur va la ricognossince de “Patrie”, soredut te sperance che altris aministrazions a sepin cjapâ a model cheste iniziative e a puedin ancje lôr adotâ decisions che no tornin a fâ resurî i muarts, ma che a son cetant impuartantis dal pont di viste simbolic. ❚