Nol è dut pierdût, ma si pues pierdi ancje ce che nus reste

L’an gnûf si è viert pal Friûl come che si jere sierât chel che al è passât. Problemis di date viere, e soluzions lontanis. E soredut, simpri mancul sperancis di saltâ fûr di chê sotanance che nus scjafoie, e che e je une des plaiis che nus tormentin. Ce che al fâs plui rabie e je la pierdite di risorsis strategjichis tal cjamp de inovazion: la ultime zoie furlane a jessi vendude a forescj e je la Biofarma di Merêt, che il colòs francês Ardian al à comprât par 1,1 miliarts di euros, ven a stâi par un valôr che al è un cuart dal belanç regjonâl.
◆ Fufignis, par un dai plui grancj fonts di invistiment europeans, che al messede ogni an plui di 100 miliarts: ma se l’un par cent dal “portfolio” lu met suntune aziende furlane, dal sigûr lu crôt un biel afâr. Pecjât che ancje cheste realtât economiche, cressude in maniere esponenziâl intai ultins agns, no sedi restade in mans furlanis. Intai agns indaûr bancjis, industriis, manifaturis, setôr dal lat, dal alimentâr e de energjie ju vin vendûts par un blanc e un neri: almancul in chest câs la ufierte no si podeve pardabon refudâ.
◆ A restin simpri compagns i problemis des nestris tieris plui debilis, soredut chês di mont. Culì une volte si diseve che no si spindeve avonde, ma cumò si viodin plans par invistiments fûr dal semenât: pistis di schi là che nol nevee plui, trois di mont che a deventin stradis asfaltadis, autostradis che a saressin dibant e che a van indevant a considerâ il nestri teritori dome tant che une servitût di passaç a pro di chei altris. Jemplâ il teritori di centralinis e eletrodots ise une soluzion? Ise chê la valorizazion turistiche e economiche che i covente ae nestre int?
◆ Gjavâts vie i bens e lis risorsis, si podeve pontâ sui servizis, ma chei fondamentâi (prin di dut la sanitât) a clopin: dopo de pandemie, i piçui ospedâi di presidi ridimensionâts tai ultins agns a spietavin di jessi riconvertîts (di Cividât a Manià, di Spilimberc a Glemone) e invezit e je lade strucje. Sierât il tribunâl (ma no la preson) a Tumieç, la Cjargne cumò e riscje di fâ di mancul ancje di une realtât informative tant che Videotelecarnia che e à simpri davuelt tai ultins 40 agns un lavôr di cussientizazion une vore impuartant pe comunitât.
◆ E cussì, intant che di altris bandis in Italie e in Europe la mont e devente ricet di esperiencis gnovis par un avignì sostignibil, modei virtuôs e di alt nivel, achì o lassìn lâ indevant il spopolament. Al puest de int a tornin i lôfs, il bosc al mangje cjamps e pascs, ma nissun plan seri, nissune iniziative concrete e partìs par fermâ chest declin.
◆ Ducj si jemplin la bocje cui progjets dal gnûf Pnrr. Ma la pôre e je che lis sperancis si mudin in grandis delusions. I Comuns di fat no àn ni i organics ni i mieçs par podê meti in vore progjets e apalts, e par lâ daûr a chestis iniziativis intai timps une vore strents che a son previodûts des cundizions che la Union Europeane e à metût. La retoriche no bastarà. Tocjarà niçâsi… ❚