CULTURE – AA.VV. Ugo Pellis, Il Friuli nelle immagini

Si trate dal catalic comentât de mostre che la Societât Filologjiche Furlane e à inmaneât inte vierte stade.
Pellis (ma, par rispietâ la etimologjie, no si varessial di dî Pelìs?), come che si sa, al fo un dai fondadôrs de SFF (Gurize, 1919) e ancje president par une dade (1920-1922). E al fo, plui di dut, il studiôs che al metè dongje dut chel materiâl impuartanton par une opare impuartantone, ven a dî l’ALI, l’atlant linguistic talian. E al fo ancje fotograf, sburtât de necessitât di fâ ben il so lavôr di racuelte di informazions lessicâls e antropologjichis.
Chest libri al ufrìs une descrizion complete dal personaç, ancje traviers des sôs fotografiis.
Cinc i ents che a àn rindude pussibile la mostre e, duncje, ancje il libri, e ducj i cinc a comparissin cuntune introduzion: in plui de SFF, l’Istitût regjonâl pe promozion culturâl, la fondazion CRUP, la Aziende special Vile Manin, e l’assessorât regjonâl ae culture.
Cuatri i saçs di coment ae opare di Pellis. Il prin, di Alvise Rampini, al è une sorte di biografie resonade e storichementri incuadrade dal ricercjadôr di Flumisel (che i à dedicât la scuele mezane dal paîs). E met in lûs ducj i merts, ma cence tasê su lis pecjis, prime jenfri dutis chê di vêsi lassât incjantâ de sirene fassiste. E cussì, si sbassà a scrivi robis orendis cuintri i sclâfs. E darest, l’intent dal regjim in cont de vore dal ALI al jere juste il contrari di ce che al è pardaboni stât, ancje al di là des intenzions di Pellis stes.
Gianfranco Ellero al scrutine il valôr sientific di un atlant linguistic e duncje ancje de opare di Pellis. Cun di plui, al tente une interpretazion ancje estetiche di cualchidune des fotografiis (e culì mi par di viodi une contradizion cul saç di Claudio Domini, Un fotografo incompreso. Proposte metodologiche per lo studio del fondo fotografico di U. P., che al mi samearès escludi intenzions estetichis intes fotos di Pellis).
Pier Giorgio Sclippa al da cont de metodologjie doprade par catalogâ lis fotos e al profite ancje par contâ la storie de beade (scuasi sante?) Antonia Mesina, che il nestri al ve la venture di fotografâ pôc timp prime de sô fin tragjiche (1935).
La part plui penze dal libri (60 pagjinis) e je chê des fotografiis in catalic. Une par pagjine, ma in dut  ben plui di 60, par vie che, ancje inte prime part, su la pagjine pari e je simpri une foto (che, cualchi volte e torne, chê stesse, inte seconde part: cheste no le ai capide: cun tantis che a son no si podevial metint di altris?). E po a son lis 16 fotografiis dai informadôrs.
Il libri al è completât di une tabele des localitâts là che Pellis al le a fâ lis sôs domandis, e di une biografie sintetiche dal ricercjadôr.
Al di là di dut, al è un libri che si passilu vulintîr e che vulintîr si cjale. Par vie che a vegnin sù tantis considerazions.
Che la int a vignivin viei plui svelts di cumò: oms di 40 agns nus samein di vê 20 di plui.
Che ducj si vistivin ce maniere che a podevin, massime i fruts: gjachetis e braghessis sbusadis, magladis.
Che, però, ducj a vevin simpri une barete, un cjapiel sul cjâf.
Che, se ducj a fasevin faturis e vitis di no crodi, lis feminis a ‘nt fasevin ancjemò plui di ducj: che al basti di viodi lis cjamis di fen che a puartavin.
Che lis distancis jenfri l’om, la sô cjase e la nature (intindude ancje come lis bestiis) e jere une vore plui curte di cumò. A mi mi reste une imagjin intai voi: la ocje che o cjatìn a p. 30 (e ancje 114). La ocje, propi jê.
La presince de lenghe furlane e je limitade a cualchi esempli di nomenclature doprade di Pellis stes. Masse pôc. Pecjât.
Laurin Zuan Nardin