Sfuei Mensîl Furlan Indipendent
Archivi de Patrie

I PROTAGONISCJ – Il Patriarcje in lote cun Trevîs e Gurize

Diego Navarria

Pelegrin II al fo patriarcje di Aquilee dal 1195 al 1204, dopo jessi stât prevost di Cividât,  arcidiacun di Aquilee e Vicedominus. La sô cariere eclesiastiche dute furlane e fâs stimâ che al fos nevôt dal patriarcje Pelegrin I di divignince trentine (Povo) e siôr di Manzan.
◆ Al fo invistît dai dirits feudâi a Como dal imperadôr Indrì VI e al cjatà il patriarcjât indebitât e, pe prime volte, menaçât de bande di soreli a mont. Al scombatè une vore, massime cuintri Trevîs che al smicjave di slargjâsi su la Patrie dal Friûl, in cubie cul cont di Gurize.
◆ I storics a marchin il so snait. Tal 1200 Pelegrin e il Comun di Trevîs, par fâ finî la vuere, a vevin nomenât arbitri il podestât di Verone. Ma il patriarcje al veve nasât (il spionaç al jere in vore ancje in chê volte) che Trevîs al tratave sot vie cun Verone e alore al veve prontade une aleance alternative. Cuant che il podestât al tacà a fevelâ a pro di Trevîs in mût sfaçât, Pelegrin si alçà in pins, al disè di jessi citadin di Vignesie (che si jere za acuardât cul Dôs) e, fuart de gnove aleance, al le vie lassant i trevisans cun tant di nâs.
◆ Tal 1195 la diete di Milan e improibì di cugnâ monede. Pelegrin alore si fasè ricognossi il dirit tirant fûr il diplome dulà che Corât II al veve concedût al patriarcje Popon, ancjemò tal 1028, di bati monede (diplome che cumò al ven stimât par fals).
◆ Nus reste, de sô gjenerositât pe glesie, la innomenade “tabula argentea” di Cividât, in origjin un antependium di meti devant dal altâr e cumò doprât tant che pale preziose. Il so stîl al marche l’incuintri di diviers lengaçs, a cjaval tra il mont todesc, chel bizantin venezian e chel romanic talian che juste tal patriarcjât di Aquilee a cjatin la crosere e la contaminazion. Pelegrin al fasè fâ ancje une uvieu, che e insiorave la basiliche di Aquilee, pierdude dopo di jessi stade dade in pegn a marcjadants venezians e no riscatade.
◆ Al murì ai 25 di Mai dal 1204 e al fo sepulît te basiliche di Aquilee, denant dal altâr di S. Ermogjene. La lastre di piere rosse di Verone de sô tombe e je ancjemò alì. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +