“Tramis Pontadis”, leturis senichis di trê tescj esemplârs de dramaturgjie furlane

Finalmentri e je rivade la ore che cheste iniziative biele e impuartante – nassude tal 2019 tra lis ativitât di “Casa Teatro” dal Teatri Gnûf “Giovanni Da Udine” a pro de promozion de culture teatrâl furlane – si davuelzi dal vîf. La rassegne di leturis senichis par furlan – ideade e cu la direzion artistiche, la cure dramaturgjiche e critiche dal scritôr Paolo Patui, cun azions su la sene curadis di Paolo Sartori e cu lis sieltis musicâls di Daniele D’Arrigo – e propon in cheste gnove edizion, nassude in colaborazion cul Tsf, trê titui che si presentin tant che grancj modei de dramaturgjie par furlan: “Tra parincjcˇ” di Luigi (Luîs) Merlo, in sene ai 5 di Novembar, “In Gjermanie!” di Giuseppe Edgardo Lazzarini, ai 10 di Novembar,  e “Presons” di Alberto Luchin, ai 17 di Novembar. Ducj  spetacui a saran aes 20.45 e simpri tal Teatri Gnûf “Giovanni Da Udine” (teatroudine.it)
◆ O vin domandât al ideadôr e diretôr Paolo Patui il parcè dal progjet e di chescj titui, che a vignaran recitâts, cun variis formulis, dai atôrs Caterina Bernardi, Manuel Buttus, Caterina Comingio, Carlotta Del Bianco, Alessandro Maione, Paolo Mutti, Gianni Nistri, Marta Riservato e Massimo Somaglino.
◆ «Tramis Pontadis – nus conte Patui – al nas de necessitât di fâ valê la dignitât e la impuartance de tradizion teatrâl furlane, che plui di cualchi volte e je considerade tant che un alc di amatoriâl e nuie di plui. Il teatri amatoriâl al à la sô impuartance storiche, sociâl e culturâl ma no si pues dismenteâ il contribût che autôrs di nivel a àn dât al nestri teatri, ae nestre culture e ae nestre societât. Lassâju intun cjanton al vûl dî gjavâ vie motivazion e valôr ae ativitât e ae esistence dal Teatri Stabil Furlan che invezit, propit par vie di cheste produzion, al vante fondis saldis e ben plantadis.
◆ La seconde edizion di Tramis Pontadis e propon trê autôrs che a vegnin di diviersis localitâts dal Friûl, e che propit par chest a rivin a furnî un esempli diferent par lenghe e par argoments.
“Tra Parincj” dal gurizan Luîs Merlo, e somee une comedie lizere ma e scuint dentri di se une dimension politiche fuarte, intant che “In Gjermanie!” e fevele de emigrazion, dantnus cussì il spont par cjalâ di une prospetive particolâr ancje la vicende migratorie di vuê. Le opare “Presons” di Luchini e je une metafore straordenarie di cemût che il teatri al rivi a mascarâ cun ironie amare la fadie dal vivi.
◆ Chest an la rassegne Tramis Pontadis e sarà insiorade de interpretazion di une schirie di atôrs di profession che a daran un contribût une vore prestigjôs al lavôr di regjie di Paolo Sartori. No si tratarà di spetacui ma di une leture in moviment, completade di intervents di spiegazion e di aprofondiment: une vere e proprie investigazion dentri dal test, des peraulis aes storiis». ❚