I capûs di Culine, il tesaur di une comunitât che e scombat

Culine, une des cuatri frazions di For Davotri, a 1250 metris sul nivel dal mâr, e je deventade famose pai siei capûs, graciis ancje ae fieste dai “cavoli nostri” che si fâs dal 2018 incà (l’an passât e je saltade pal virus) la prime domenie di Otubar. E je la ocasion par gustâ intai chioscs il capûs intes diviersis pitancis de nestre cusine cjargnele (mignestron, ma ancje “cueste e cjapût cu la sopo”, “crauts cu la sopo di spongjo e friços”, “salato di cjapût cu las friços”, e v.i.). La idee de fieste e je nassude tal 2018 di Gino Caneva e Stefano Cantone e a son stâts cjapâts dentri tal progjet i ripârs Marinelli e Lambertenghi, il ristorant Staipo da Canobio, Malghe Morarêt, la Associazion Turistiche “Pro Forni Avoltri”, il Consorzi Privât di Culine e i volontaris dal paîs.
◆ Par ce che al tocje la semence “no si sa la dato preciso di cuant che a rimonto” e dîs inte sô variante in “o” Ines Caneva, segretarie dal Consorzi Privât di Culine – Comunion familiâr montane .“Si sa che e je une semence un grum vecje. Ogni famee a Culine e veve i siei capûs che a vignivin di une uniche sorte di semence. E se par câs un an no vignive une buine semence, si leve di imprest: e jere une specie di mutui socors! Tai ultins agns, cui cambiaments vignûts dal dispopolament, de maniere di vivi, simpri mancul int e coltivave la tiere. La semence, chê origjinâl, e je restade dome in gracie de famee di Ciro e Margherita Toch, e cumò ancje dai lôr fîs che a àn metût sù la aziende agricule. Chest al à permetût di mantignî lis cualitâts e lis carateristichis dai capûs, che a son il savôr, la consistence e la rese. Stant che al è un prodot unic, une part des semençutis e je stade depositade te bancje des semencis de Universitât dal Friûl. Il capûs al è un prodot PAC (prodot a cure alimentâr e tradizionâl dal F-VJ) e dal an passât al è deventât ‘Presidi slow food’. Lis semençutis, che a son sieradis intun piçul cosul, te Vierte – cirche a Sant Marc, ai 25 di Avrîl – a vegnin semenadis intun plet tal ort. Tor de metât di Jugn, sù par jù a Sant Antoni, ai 13 di Jugn, lis plantutis che a son cressudis a vegnin gjavadis e tornadis a plantâ tal cjamp, a 50 centimetris di distance une di chê altre. Tal periodi che al cres il capûs, al è simpri lavôr di fâ, massime par gjavâ dutis lis jerbatis che a cressin, cuntun lavôr che si fâs dut a man. Ae fin di Setembar cirche, il capûs al è sierât e pront par jessi cjapât sù. Nol à teme dal clime frêt, anzit se al cjape une buine rasade al ven inmò miôr. Un contribût al è dât de altece di Culine che e va di 1100 a 1250 metris slm. Duncje il salt termic de gnot al favorìs la cressite e al fâs deventâ il prodot biel crostulin.”
◆ Tal 2018 si è costituide la CoopMont propit par continuâ la coltivazion dai capûs e dai prodots tipics da zone: chest an, a son stât semenâts cirche 10.000 capûs.
◆ I timps a son cambiâts ma “Se o ai voie un an di fâ il gno cjamp – e continue Ines – o voi a CoopMont e i domandi la semence o lis plantutis dal capûs. Chest an, no vevi la semence des cartufulis e o soi lade li di Margherita Toch che mi ‘nd à dade une buine.”
◆ Dal an passât, si coltive ancje la cjanaipe, che e covente par fâ un bon vueli, e di chest an il favin, une semence antighe che e ven di Sapade: al è clâr che a son ducj prodots biologjics.
◆ “Lu cjapût di Culino”, esempli di riprese di une piçule comunitât di pocjis animis, indulà che a son restadis viertis dôs ostariis, un albierc e li che la prime buteghe di alimentârs e je a Sighiet, a 3 km di distance “e cun di plui – e siere Ines – di cirche un mês o vin la strade sierade par lavôrs, e dome in cualchi orari le tornin a vierzi… O scombatìn par podê restâ achì!” ❚