Al rive Suns Europe

Suns Europe al torne vie pal Istât ancje tal 2021 e al conferme a fuart il so spirt furlan e internazionâl. La edizion di chest an dal festival european des arts intes lenghis di minorance, inmaneât de cooperative Informazione Friulana, la cjase editore di Radio Onde Furlane, cul jutori finanziari de Regjon Friûl-VJ, de ARLeF (Agjenzie Regjonâl pe Lenghe Furlane) e de Fondazione Friuli, e cu la colaborazion dal Comun di Udin, dal Etxepare Euskal Institutua dal Paîs Basc e di cetantis altris entitâts europeanis, si davuelç dai 21 di Lui al prin di Avost.
◆ Tra musiche, cine e leterature, ancje chest an al sarà cetant – e cetant di bon – ce scoltâ, ce sintî, ce viodi, ce cjalâ e ce lei. A saran sù par jù dôs setemanis di sunôrs, di visions, di peraulis, di storiis, di personis e di progjets, espressions vivis e vivarosis di une Europe unide e plurâl, che e domande a fuart il rispiet dal dirit ae lenghe e dal dirit ae diversitât.
◆ Par ce che al tocje il cine, a saran dôs proiezions di gale, a Udin li dal Visionario intes seradis dai 28 e dai 29 di Lui, cun “Bogre”, il film dal regjist ocitan Fredo Valla che al conte lis eresiis de Europe, de Bulgarie ae tieris “d’Oc”, e cun “Ane”, une des peliculis plui resintis dal cine basc, che e à vinçût diviers ricognossiments, tacant dai Premis Goya pe miôr atore protagoniste, pe miôr atore rivelazion e pe miôr senegjature.
◆ Tra i apontaments di caratar leterari a son l’incuintri cu la scritore Cira Crespo, autore dal libri “Baginen. Euskal Herriko Historia Emakumeen Bitzartez”, dedicât aes feminis che a àn fat sù il Paîs Basc, che si fasarà a Udin li de librarie Tarantola aes 6 sore sere ai 27 di Lui, e chel dedicât ai rapuarts tra Dante e la poesie dai trobadors ocitans, in program in chê stesse date, ma aes 9 di gnot, a Murùs.
◆ Une vore siore la ufierte musicâl, tra concierts ator pal Friûl, tra Romans, Dartigne, Lusevare, Puçui, Cormons, Lavarian e Feagne, e lis dôs sabidis di sere (dai 24 e dai 31 di Lui) a Udin: la prime, in place Venerio, cun “Suns Friûl”, rassegne dedicade ae produzion musicâl di chenti, cun Cristian Mauro, Nicole Coceancig, Vididule Project e Trabeat che si confrontaran cui bascs Ezpalak, e la seconde, tal plaçâl dal Cjistiel, cu la cjantante sarde Daniela Pes, cu la band basche Liher, cu la cjantante rumance Ursina, cui furlans Brût & Madone e cul grup des isulis Faroer Land of Maybe. Tra i protagoniscj di chei altris concierts a son ancje il ladin Felix Lalù, lis galizianis Caamaño & Amexeiras, la faroese Dania O Tausen e i furlans Orko Trio e Anna Giavon.
◆ Il festival al ven oviementri inmaneât daûr des normis di sigurece. Dutis lis informazions in detai in cont dai varis apontaments si cjatin sul sît www.sunseurope.com e su la pagjine Facebook de manifestazion: https://www.facebook.com/SunsEuropeFestival. ❚